Goa Electricity: गोव्यात वीज खात्याकडून पथदीपांचा भार सामान्य ग्राहकांवर

Goa Electricity: वीज खात्याकडून पथदीपांचा भार वीज ग्राहकावर लादला जात आहे. मात्र, वीज खात्याने या संदर्भात कोणतीच पूर्वसूचना न देता वीज बिलात पब्लिक लायटिंग ड्युटी या अंतर्गत वीज ग्राहकांकडून वसूल करण्यात येत आहे.

दरम्यान, या संदर्भात योग्य प्रकारे जागृती झाली नसल्याने सामान्य वीज ग्राहक वाढीव वीज बिल पाहून बुचकळ्यात पडले आहेत. घरघुती वीज ग्राहकांना प्रति युनिट पाच पैसे व व्यवसायिक वीज ग्राहकांना प्रति युनिट वापरावर आठ पैसे या दराने वसूली करण्यात येत आहे.

तसेच, या संदर्भात वीज अभियंत्यांशी संपर्क साधला असता या संदर्भाच्या दुरुस्तीला विधानसभेत मान्यता मिळाल्यानंतर त्याची कार्यवाही करण्यात आली आहे असे सांगण्यात आले. यापूर्वी पथदीप दुरुस्तीचा खर्च पंचायती पालिकेकडून करण्यात येत होता. पण तो भार वीज खात्याने उचलला आहे, असे सांगण्यात आले.

या निर्णयाला पैंगीणचे पंच सतीश पैंगीणकर विरोध केला आहे. ग्राहकांना दहा ते वीस रुपयांपर्यत वाढीव रक्कम बिलापोटी भरावे लागत आहेत. त्याचा वीज खात्याने पुनर्विचार करण्याची मागणी पैंगीणकर यांनी केली आहे.