Goa Assembly Monsoon Session: पेडणेतील अबकारी घोटाळाप्रकरणी श्‍वेतपत्रिका काढा- सरदेसाई

Goa Assembly Monsoon Session अबकारी खात्याच्या पेडणे कार्यालयातील घोटाळ्याचे प्रकरण आज विधानसभेत गाजले. पेडणे तालुक्यात पाच वर्षांत किती पार्ट्यांना परवानगी दिली आणि किती शुल्क आकारले, त्यातून झालेल्या भ्रष्टाचाराची ऑडिट सेलअंतर्गत चौकशी केली जाईल.

जर त्यात खरोखरच घोटाळा झाला असेल तर तीही रक्कम वसूल केली जाईल, असे आश्वासन मुख्यमंत्री डॉ. प्रमोद सावंत यांनी दिले. अबकारी खात्याचा महसूल ३३.१६ टक्क्यांनी वाढला आहे. आता खात्यातर्फे परवाना देण्यास विलंब होत नाही, असे सावंत म्हणाले.

किती पार्ट्यांना मंजुरी दिली, ते तपासा!

अबकारी खात्यातील कोट्यवधींच्या घोटाळ्याप्रकरणी श्वेतपत्रिका काढावी, तसेच ती या अधिवेशन काळातच यावी, अशी मागणी विरोधी पक्षनेते विजय सरदेसाई यांनी केली. या घोटाळ्यात सहा अबकारी निरीक्षकांचा सहभाग होता.

पहिल्या आणि शेवटच्या निरीक्षकांना निलंबित केले. मधील चारजणांना कारणे दाखवा नोटीस बजावली. जो कारकून आहे, त्याला निलंबित केले; पण त्याचा जबाबच घेतला नाही.

मागील पाच वर्षांत उपजिल्हाधिकाऱ्यांनी पेडणे तालुक्यात किती पार्ट्यांना मंजुरी दिली, हे तपासावे. त्यातून किती महसूल खात्याला मिळाला, ते समजून येईल. परंतु हा कोट्यवधींचा घोटाळा आहे, असे सरदेसाई म्हणाले.

...तर खरा सूत्रधार पुढे आला असता : पेडण्यातील अबकारी खात्यात कोट्यवधींच्या घोटाळा प्रकरणानंतर संबंधित कारकुनावर निलंबनाची कारवाई केली; पण खऱ्या अर्थाने त्याच्याविरोधात पोलिस तक्रार झाली असती आणि त्याला अटक झाली असती, तर त्या प्रकरणातील खरा सूत्रधार कोण हे समजले असते, असे काँग्रेसचे आमदार कार्लुस फेरेरा म्हणाले.

पावसाळी अधिवेशनात मागण्या आणि कपात सूचना या विषयावर ते बोलत होते. अबकारी खाते महालेखापालांनी (कॅग) दिलेल्या अहवालाची गंभीरपणे दखल घेत नाही, असेही ते म्हणाले.