मोरजी : पेडणे तालुक्यात पंचायत निवडणुकीसाठीचा प्रचार रंगात आला आहे. तालुक्‍यातील दोन्ही आमदारांची प्रतिष्‍ठा पणाला लागलेली आहे. पेडणेचे आमदार प्रवीण आर्लेकर व मांद्रेचे जीत आरोलकर यांनी अजूनपर्यंत पत्ते खुले न केल्‍याने मतदारांमध्‍ये संभ्रम निर्माण झाला आहे.
पंचायत निवडणुका जरी राजकीय पक्षांच्या चिन्हांवर होत नसल्‍या तरी दोन्ही मतदारसंघांतून आपलेच समर्थक उमेदवार निवडून यावेत यासाठी दोन्ही आमदारांनी कंबर कसली आहे. काही प्रभागांमध्ये मगोचे मगोविरोधात तर भाजपचे भाजपच्याविरोधात उमेदवार उभे ठाकले आहेत. या आमदारांचे समर्थक उमेदवार कोण, त्यांचे पॅनल कोणते ते अजून जाहीर करण्‍यात आलेले नाही.
लाखो रुपयांची उलाढाल
पंचायत निवडणुकीसाठी उमेदवाराला केवळ 40 हजार रुपये खर्च करण्याची मुभा आहे. परंतु काही प्रभागांमध्ये लाखो रुपयांची आर्थिक उलाढाल होत असल्याचे चित्र दिसून येतेय. काही ठिकाणी एका मतासाठी हजारो रुपये देण्याची तयारी उमेदवारांनी केलेली आहे. तर, काही उमेदवारांनी घरात कितीही मते असली तरी एक मोठी रक्कम निश्‍चित केलेली आहे.
ओल्या पार्ट्यांना उधाण : निवडणुकीच्या पार्श्वभूमीवर गावागावांत, वाड्यावाड्यांवर ओल्या पार्ट्यांच्या मेजवानी रंगत आहे. मद्यालयांमध्‍ये तर मोठ्या प्रमाणात गर्दी दिसून येत आहे. श्रावण महिना असल्याने त्यावर काही निर्बंध आले असले तरी काही युवकांची बारमध्ये रेलचेल वाढली आहे.
दैनिक गोमंतकचे सदस्य व्हा
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
