Goa Panchayat Election: पंचायत निवडणुकीचे ‘बिगूल’

मिलिंद म्हाडगुत

फोंडा: जून ही तारीख पंचायत निवडणुकीकरिता तात्त्विकदृष्ट्या निश्चित झाल्यामुळे सध्या फोंडा तालुक्यातील पंचायतीत इच्छुक उमेदवारांचे पेव फुटले आहे. जो तो या निवडणुकीत आपले नशीब आजमावण्याचा प्रयत्न करणार असल्याचे संकेत मिळत आहेत. फोंडा तालुक्यात 19 पंचायती असून त्यातील अठरा पंचायती या फोंडा तालुक्यातील चार मतदारसंघात मोडतात. यंदा इच्छुक उमेदवारांची गर्दी दिसत असल्यामुळे यावेळी संघर्षमय निवडणूक होण्याचे चित्र दिसायला लागले आहे.

फोंडा तालुक्यातील तीन मतदारसंघात भाजप आमदार असल्यामुळे या तीनही मतदारसंघातील पंचायतीतून अनेक इच्छुक उमेदवार रिंगणात उतरण्याची तयारी करताना दिसत आहेत. आपणच मंत्र्यांचे ‘खास आदमी’ असून आपल्यालाच मंत्री पाठिंबा देणार असे स्वप्न अनेक इच्छुक उमेदवार रंगवताना बघायला मिळत आहे. त्यामुळे मंत्र्यांची गोची झाली असून त्यांची ‘टु बी ऑर नॉट टू बी’ अशी अवस्था व्हायला लागली आहे.