Girish Chodankar: तूरडाळ, साखरेनंतर आता चार टन हरभऱ्याची नासाडी

Girish Chodankar: गरीब जनतेसाठी केंद्र सरकारच्या कोट्यातून मिळालेली तूरडाळ, साखर खराब केल्याचे प्रकरण चर्चेत असतानाच आता फोंडा येथील सरकारी गोदामातील चार टन हरभऱ्याची नासाडी केल्याचा गंभीर प्रकार उघडकीस आला आहे.

यामुळे जीवनावश्यक वस्तूंची नासाडी करणाऱ्यांविरोधात गंभीर गुन्हे दाखल करून कठोर शिक्षा करावी, अशी मागणी होत आहे. याविरोधात सामान्य नागरिकांमधूनही तीव्र संतापाची लाट उसळली आहे. तसेच विरोधकांनीही सरकारवर टीकास्त्र सोडले आहे.

कोरोना महामारीच्या काळात सामान्य लोकांसाठी वितरित करण्याकरिता केंद्र सरकारच्या कोट्यातून आलेली कोट्यवधी रुपयांची 241 मेट्रिक टन तूरडाळ आणि 10.13 मेट्रिक टन साखर खराब झाल्याचे कारण देत त्याची विल्हेवाट लावण्यासाठी निविदा काढल्या होत्या.आता हरभराही खराब झाल्याची घटना समोर आल्याने त्याची विल्हेवाट लावण्यात येणार आहे.

"जीवनावश्यक वस्तूंची नासाडी, हा गंभीर स्वरूपाचा गुन्हा आहे आणि नागरी पुरवठा खात्याचे अधिकारी तो वारंवार करत आहेत. त्यामुळे त्यांच्यावर गुन्हे दाखल झालेच पाहिजेत. या प्रकरणाशी संबंधित मंत्र्यांनी राजीनामा द्यावा. शिवाय गरिबांच्या तोंडचा घास पळवणाऱ्या सरकारने खुर्ची सोडावी."

- गिरीश चोडणकर, माजी प्रदेशाध्यक्ष, काँग्रेस.