Goa Fire Case: रेवोडात अग्नितांडव! शेकडो काजू कलमे जळून खाक, हजारोंचे नुकसान

Goa Fire Case: रेवोडा चर्च- कोलवाळनजीक गणेश फट्टे यांच्या मालकीच्या काजू बागेला रविवारी संध्याकाळच्या सुमारास भीषण आग लागल्याची माहिती हाती आली आहे.

आगीची तीव्रता एवढी होती की फट्टे यांची जवळपास शेकडो काजू कलमे आगीच्या भक्ष्यस्थानी पडली. यंदा काजूचे अल्प पीक असून त्यात पुन्हा हे आगीचे संकट कोसळल्याने फट्टे कुटुंबीय हवालदिल झले आहे.

या घटनेसंबंधी मिळालेल्या माहितीनुसार रविवारी संध्याकाळी 5. 15च्या दरम्याने अग्निशमन दलाला रेवोडा येथे काजू बागेला आग लागल्याची महिती मिळाली. आगीचे वृत्त समजताच अग्निशमनची टीम घटनास्थळी दाखल झाली.

मात्र तोपर्यंत वाऱ्यामुळे बागेतील आग भडकली आणि जवळपास हजारो कलमे आगीच्या भक्ष्यस्थानी पडली. काजू कलमांसोबत लगतची आंब्याची अंदाजे 200 कलमे आणि 50 माड यांनाही या आगीची झळ बसली.

अग्निशमनचे दलाचे ज्ञानेश्वर सावंत, स्वप्नेश कळंगुटकर, गिरीश गावास, दिलीप सावंत, परेश मांजरेकर या कर्मचाऱ्यांनी प्रयत्नांची पराकाष्ठा करत या आगीवर नियंत्रण मिळवले.

या आगीत जवळपास लाखभराचे नुकसान झाल्याचे समजतेय. ही दुर्घटना कशी घडली याचे कारण अद्याप समजू शकले नाही.

यंदा काजूचे पीक कमी आल्याने शेतकरी हवालदिल झाला आहे. तसेच काजू बी खरेदीचा दरही कमी झाल्याने बागांची साफसफाई, मजुरी, फवारणी याचा खर्च तरी सुटेल कि नाही अशा दुहेरी संकटात बागायतदार सापडला आहे.

त्यातच या अशा घटना घडल्याने शेतकरी मेटाकुटीला येत आहे. शासनाने काजू उत्पादनासाठी सबसिडी द्यावी अशी मागणी यानिमित्ताने होताना दिसत आहे.