गायीच्या तोंडात फुटला 'गावठी बाँब'

फोंडा: (Goa News) कवळे परिसरातील डोंगराळ भागात एक गाय (Cow) जखमी झाल्याचे निदर्शनास आल्याने प्राणीमित्रांनी या प्रकाराची दखल घेऊन तिची रवानगी गुरांवर उपचार करणाऱ्या संस्थेकडे केली. या गायीचे तोंड फाटल्याने जिभेलाही जखम झाली होती. डोंगराळ भागात चरत असताना गावठी बाँब (Bomb) या गायीच्या तोंडात जाऊन तो फुटल्याने ती जखमी झाली असावी, असा कयास प्राणीमित्रांनी व्यक्त केला आहे.

कवळेत ही गाय जखमी झाल्याचे ग्रामस्थांच्या निदर्शनास आल्यानंतर त्यांनी प्राणीमित्रांना कळवले. येथील प्राणीमित्र संकेत नार्वेकर आणि त्यांच्या सहकाऱ्यांनी लगेच धाव घेऊन या जखमी गाईला जांबावली येथील ध्यान फाऊंडेशनमध्ये उपचारासाठी पाठवले. तेथे तिच्यावर लगेच उपचार सुरू करण्यात आले.

दरम्यान, कवळे तसेच इतर ठिकाणच्या डोंगराळ भागात रानडुक्कर तसेच इतर रानटी श्‍वापदे ठार मारण्यासाठी गावठी बाँबचा वापर केला जात असल्याचा दावा स्थानिकांनी केला आहे. संबंधित सरकारी यंत्रणेने या प्रकाराची त्वरित दखल घेऊन असे प्रकार टाळावेत, अशी मागणी ग्रामस्थांनी केली आहे.