Goa Navratri Festival : घोटेली-सत्तरीत सार्वजनिक नवदुर्गा उत्सवाचे आयोजन

Navratri 2022: घोटेली नं 2 केरी-सत्तरी येथील सार्वजनिक नवदुर्गा उत्सव मंडळातर्फे 26 ते 5 ऑक्टोबरपर्यंत नवदुर्गा उत्सव साजरा करण्यात येणार आहे. 27 रोजी संध्याकाळी 4.00 वाजता महिलांसाठी पाककला स्पर्धा (तांदळाच्या पिठापासून गोड पदार्थ) व रात्री मोर्ले-सत्तरी येथील दांडिया पथकाकडून दांडिया नृत्य करण्यात येणार आहे.

28 रोजी संध्याकाळी 7 वाजता केरी-विर्डी येथील कलाकारांतर्फे कळशी नृत्य, कुणबी डान्स व समई नृत्य स्पर्धा, 29 रोजी संध्याकाळी 4 वाजता 15 वर्षांखालील मुलामुलींसाठी चित्रकला स्पर्धा, 7 वाजता महिलांसाठी वेशभूषा स्पर्धा व रात्री 9 वाजता दांडिया नृत्य होईल.

30 रोजी संध्याकाळी 4 वाजता 40 वर्षांवरील नागरिकांसाठी अभंग गायन स्पर्धा, संध्या. 7.00 वाजता 15 वर्षांखालील मुलांमुलींसाठी नृत्य स्पर्धा होईल. 1 रोजी संध्याकाळी 4 वाजता बालकलाकार घुमट आरती मंडळ घोटेलीतर्फे घुमट आरती, 5 वाजता केरी मर्यादित पुरस्कृत रांगोळी स्पर्धा, रात्री 8.00 वाजता दशावतारी नाट्यप्रयोग होणार आहे.

2 रोजी सकाळी 11.00 वाजता श्री आजोबा महाराज पंगड केरीतर्फे पर्यावणपूरक आकाशकंदील स्पर्धा (केरी, पर्ये व मोर्ले पंचायत मर्यादित), दुपारी 3 वाजता अखिल गोवा फुगडी स्पर्धा होईल. यात पहिले 7777 रु., दुसरे 5555 रु. व तिसरे 3333 रु. व उत्तेजनार्थ बक्षिसे देण्यात येणार आहेत.

3 रोजी दुपारी 3 वाजता अभंग गायन स्पर्धा केरी, मोर्ले, पर्ये पंचायत मर्यादित, संध्या. 6 वा. सिद्धकला नृत्य संस्था साखळीतर्फे भरतनाट्य, लोकनृत्य व इतर नृत्य दांडिया नृत्य होणार आहे. 4 रोजी सकाळी 11.30 वाजता बक्षीस वितरण सोहळ्याला माजी मुख्यमंत्री प्रतापसिंह रावजी राणे व विजयादेवी राणे, प्रमुख वक्ते ॲड. रमाकांत खलप, संयुक्त मामलेतदार श्रीपाद माजिक, सरपंच दीक्षा चंद्रकांत गावस, उपसरपंच भिवा नारायण गावस, पंच राजेश तुकाराम गावस उपस्थित असतील.

संध्याकाळी 4 वाजता फुलांचा हार बनवण्याची स्पर्धा, तर 6 वा. 15 वर्षांखालील लहान मुलांसाठी वेशभूषा स्पर्धा होईल. 5 रोजी संध्याकाळी 4 वा. दिंडीसह दुर्गादेवीच्या मूर्तीची भव्य मिरवणूक व नवदुर्गा मूर्तीचे विसर्जन करण्यात येणार आहे.