Goa News: 57 लाखांचे वीजबिल अखेर 568 रुपयांवर स्‍थिरावले

Goa News: वीज खात्याचा एक अजब कारभार समोर आला आहे. खात्याने देऊळवाडा-मांद्रे येथील केशव मंगेश मांद्रेकर यांना ऑक्टोबर महिन्याचे वीज बिल तब्बल 57 लाख 36 हजार रुपये इतके पाठविले होते. या प्रकाराची राज्यभर चर्चा झाल्याने वीज खात्याने तत्काळ दुरुस्ती करत 568 रुपयांचे बिल दिले.

केशव मांद्रेकर यांना कधी 800 रुपयांहून अधिक बिल आले नाही. मात्र, ऑक्टोबर महिन्याचे बिल तब्बल 57 लाख 36 हजार 285 रुपये इतके आल्याने त्यांना धक्का बसला. त्यांनी तत्काळ आगरवाडा येथील उपविभागीय वीज केंद्रात जात तेथील अधिकाऱ्यांकडे चर्चा केली.

त्यावर अधिकाऱ्यांनी आपण यावर चर्चा करून विजेचे बिल सुरळीत करून घेऊत असे आश्‍वासित केले. त्यानुसार आज सायंकाळपर्यंत मांद्रेकर यांना 568 रुपयांचे बिल देण्यात आले.

"चुकीसाठी जबाबदार असलेल्या दोन कर्मचारी मीटर रीडर आणि बिल तपासणाऱ्यांवर कारवाई केली जाईल. बिलात झालेली चूक सिस्टिमवर दाखवली जाते, तेव्हा ती दुरुस्त केली गेली नाही."

- स्टिफन फर्नांडिस, मुख्य अभियंता