पावसाने विश्रंती घेतल्याने, भातपीक शेतकऱ्यांना दिलासा

डिचोली: तालुक्यातील बहूतेक सर्व भागात भातकापणी आणि मळणीची कामे अंतिम टप्प्यात आली आहेत. काही भागात ही कामे पूर्ण झाली आहेत. गेल्या चार दिवसांपासून पावसानेही कृपा केल्याने कापणी आणि मळणीच्या कामात अजूनतरी व्यत्यय आलेला नाही.

पावसाची (Rain) कृपा अशीच राहिल्यास येत्या दोन दिवसात शेतीची कामे पूर्ण होण्याची शक्यता आहे. दरम्यान, ऐन पिकाच्यावेळी यंदा परतीच्या पावसाने कहर केला असला, तरी यंदा भातपिक समाधानकारक असल्याचा दावा कृषी खात्याने (Department of Agriculture) व्यक्त केला आहे.

मयेत कामे अंतिम टप्प्यात

मये भागात सध्या भातकापणी आणि मळणीची कामे जोरात सुरु आहेत. हळदणवाडी-मये येथे यंत्राद्वारे भातकापणी आणि मळणीच्या कामाचा आमदार(MLA) प्रवीण झाट्ये यांच्या हस्ते शुभारंभ करण्यात आला. यावेळी मयेची सरपंच स्मिता आरोंदेकर, उपसरपंच कृष्णा परब, पंच विश्वास चोडणकर, तुळशीदास चोडणकर आणि उर्वी मसूरकर, वासू गावकर आदी उपस्थित होते. कृषी क्षेत्रात आधुनिकतेचा शिरकाव झाल्यापासून क्वचित ठिकाणी वगळता बहूतेक भागात यंत्राद्वारे भाताची कापणी आणि मळणी करण्याकडे शेतकऱ्यांचा कल वाढला आहे. मये भागातही यंत्राद्वारे भातकापणी आणि मळणीची कामे करण्यात येतात.