Tree Collapsed: मोपा येथील मुख्य रस्त्यावर कोसळला माड; चोर्ला घाटातही धोकादायक झाडांमुळे वाहतुकीला धोका

Tree Collapsed On Mopa Road: राज्यात पावसाचा जोर वाढला आहे. काही दिवसांमध्ये मागील महिन्यापेक्षा जास्त पावसाची नोंद झाली आहे. परिणामी राज्यात ठिकठिकाणी पडझडीच्या घटनाही समोर आल्या आहेत.

मुसळधार पावसामुळे मोपा येथील मुख्य रस्त्यावर दाडेश्वर मंदिराजवळ भलामोठा माड कोसळला आहे.

हे झाड कोसळल्याने रस्त्यावर मोठ्या प्रमाणात वाहतूक कोंडी झाली. यानंतर अग्निशमन दलाला बोलावण्यात आले. माहितीनुसार, यामध्ये कोणतीही जीवितहानी झाली नाही. परतीचा पाऊस सुरू असल्याने राज्यभर हाहाकार माजवला आहे. रस्त्यावर झाडे कोसळण्याचे अनेक प्रकार समोर येत आहेत.

यामध्ये वाहनचालकांना नाहक त्रास सहन करावा लागत आहे.

दुसरीकडे चोर्ला घाटातही अनेक धोकादायक झाडे रस्त्यावर आल्याने वाहतुकीला अडथळा निर्माण झाला आहे.

ही झाडे कधीही रस्त्यावर कोसळून वाहनचालकांच्या जीवाला धोका निर्माण होऊ शकतो. त्यामुळे वेळीच ही झाडे हटवावीत, अशी मागणी करण्यात येत आहे.

दरम्यान, काही दिवसांपूर्वी नावेली येथे मुसळधार पावसामुळे मुख्य रस्त्यावर भलेमोठे झाड एका दुचाकीवर कोसळले. यामध्ये चालक महिलेचा जागीच मृत्यू झाल्याची दुर्दैवी घटना घडली होती.

पावसामुळे घडत असलेल्या या घटनांबाबत नागरिकांनी चिंता व्यक्त केली आहे.