Goa Rain: विजांच्या गडगडाटांसह परतीच्या पावसाने राज्याला पुन्हा झोडपले

Goa Rain: राज्यात काल पावसाने पुन्हा हजेरी लावली. संध्याकाळी 4.20 च्या सुमारास वादळी वारा व विजांच्या गडगडाटासह जोरदार पावसाला सुरवात झाली. अचानक बरसलेल्या पावसामुळे नागरिकांची तारांबळ उडाली.

ऐन दिवाळीत राज्यात पावसाचा हाहाकार सुरुच असून, अनेक ठिकाणच्या नरकासुराच्या प्रतिमा भिजण्याबरोबरच शेतीचेही नुकसान झाले. अनेक ठिकाणची भातशेती आडवी झाली. आजही राज्यात तुरळक पावसाची शक्यता गोवा वेधशाळेने वर्तविली आहे.

दरम्यान, विदर्भातील काही भागांतून मॉन्सूनचा परतीचा प्रवास सुरु झाला आहे. छत्तीसगड, ओडिशा आणि उत्तर बंगालच्या उपसागराच्या उर्वरित भागातूनही पावसाचा परतीचा प्रवास सुरू झाला आहे. शनिवारपर्यंत तेलंगणा, आंध्रप्रदेश आणि मध्य बंगालच्या उपसागरातून परतीचा प्रवास सुरू होण्याची शक्यता आहे.