Goa Monsoon: गोव्यात 3 दिवस 'ऑरेंज अलर्ट', वाऱ्यांचा वेग वाढण्‍याची शक्‍यता; हवामान खात्याकडून खबरदारीचं आवाहन

पणजी: राज्यात सध्या अवकाळी पावसाने जोरदार हजेरी लावली असून, गोव्यातील विविध भागांत संततधार सुरू आहे. दरम्यान, हवामान खात्याने गोव्यातील नागरिकांसाठी महत्त्वाचा इशारा देत १५, १६ आणि १७ जून रोजी ऑरेंज अलर्ट जारी केला आहे.

गेल्या काही दिवसांपासून गोव्यात पावसाचा जोर कायम असून, अनेक भागांत जोरदार सरी कोसळत आहेत. यामुळे काही भागांत रस्ते जलमय झाले आहेत तर काही ठिकाणी वाहतुकीवरही परिणाम झाल्याचे पाहायला मिळत आहे.

हवामान विभागाच्या अंदाजानुसार, उत्तर गोवा आणि दक्षिण गोव्यात पुढील काही दिवस हलक्या ते मध्यम स्वरूपाच्या पावसाची शक्यता आहे. काही ठिकाणी वाऱ्याचा वेग अधिक राहू शकतो, त्यामुळे नागरिकांनी अत्यंत सतर्क राहावे, असे आवाहन गोवा वेधशाळेने केले आहे.

नागरिकांसाठी सूचना:

• गरज नसल्यास घराबाहेर पडू नका.

• विजांच्या गडगडाटाच्या वेळी झाडांखाली उभं राहू नका.

• ओले रस्ते आणि साचलेल्या पाण्यामुळे अपघाताचा धोका संभवतो, त्यामुळे वाहनचालकांनी विशेष काळजी घ्यावी.