Goa Monsoon 2023 राज्याला सलग दोन दिवस मुसळधार पावसाने झोडपले असून या कोसळणाऱ्या पावसामुळे राज्यातील जनजीवन विस्कळीत झाले आहे. कोसळणारा पाऊस आणि सोसाट्याच्या वाऱ्यामुळे मोठमोठीं झाडे पडणे, दरडी- भिंत कोसळणे, रस्ता खचणे अशा घटना घडत आहेत.
अनेक ठिकाणी पाणी साचल्यामुळे स्थानिकांना विविध समस्यांना तोंड द्यावे लागत आहे. काही ठिकाणी वाहतूक कोंडी तर काही भागात वीजपुरवठा खंडित झाल्याची माहीती मिळालीय. दरम्यान आज पर्ये सत्तरीत पडझडीचे सत्र आज पाहायला मिळाले.
पर्येतील मधलावाडा येथील रहिवासी प्राजक्ता गावस यांच्या घरावर आंब्याचं झाड पडल पडलं असून घराच्या पडवीच्या पत्र्याचं नुकसान झालं आहे. तर दुसऱ्या घटनेत इस्माय हैदर करोल यांच्या घरावर सागवानाचे झाड पडलं असून त्यांच्या घराचं अंदाजे लाखभराचं नुकसान झाल्याची प्राथमिक माहिती प्राप्त झाली आहे.
या मुसळधार पावसाने अर्जून चंद्रू गावकर यांच्या मातीच्या घराची भिंत कोसळली असून या दुर्घटनेत त्यांचे 80 हजारांचे नुकसान झाल्याची माहिती समोर येतेय. सुदैवाने या तिन्ही घटनांमध्ये जिवीतहानी झाली नाहीय.
मागील 24 तासांत राज्यात एकूण 86.9 मिमी. (3.38 इंच) पावसाची नोंद करण्यात आली असून आतापर्यंत राज्यात एकूण 70 इंच पाऊस पडला आहे. गोवा हवामान खात्याने पुढील दोन - तीन दिवसांसाठी ऑरेंज अलर्टसह मुसळधार पावसाचा अंदाज व्यक्त केला आहे. तसेच नागरिकांनी सतर्क राहावे तसेच योग्य ती काळजी घेण्याचे आवाहन हवामान खात्याद्वारे करण्यात आले आहे.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.