Goa Monsoon 2023: गोव्यात दोन्ही जिल्ह्यात पावासाची संततधार सुरू आहे. मुसळधार पावसामुळे विविध ठिकाणी पडझड झाली असून, काही भागात रस्ते तसेच भिंत खचल्याचे प्रकार समोर आले आहे. राजधानी पणजीसह अनेक ठिकाणी पाणी साचल्यामुळे स्थानिकांना विविध समस्यांना तोंड द्यावे लागले.
राज्यातील काही भागात वाहतूक कोंडीची समस्या देखील निर्माण झाली. दरम्यान, राज्यात आज आणि उद्या (28,29 जून) ऑरेन्ज अलर्ट जारी करण्यात आला असून, मुसळधार पावासाचा इशारा हवामान खात्याने दिला आहे.
मुसळधार पावासाचा इशारा
गोवा हवामान खात्याने पुढील पाच दिवसांसाठी मुसळधार पावसाचा अंदाज व्यक्त केला आहे. आजच्या (बुधवारी) दिवशी तुरळक ठिकाणी मुसळधार पाऊस पडेल तर, 29 आणि 30 जून रोजी काही ठिकाणी जोरदार सरी बरसतील, एक जुलै रोजी देखील मुसळधार पाऊस पडेल अशी शक्यता हवामान खात्याने वर्तवली आहे.
28 आणि 29 जूनसाठी हवामान खात्याने राज्यात ऑरेन्ज अर्लट जारी केला असून, सतर्क राहण्याचा इशारा दिला आहे.
पडझड, रस्ते खचले, वाहतूक कोंडी; राज्यात कुठे काय झाले?
मुसळधार पावसामुळे दोन्ही जिल्ह्यात पडझड होण्यासह रस्ते, भिंत खचण्याच्या घटना घडल्या आहेत. तसेच, काही भागात वाहतूक कोंडी निर्माण झाली. पणजीत पावसाचे पाणी साचल्याने पाणी स्थानिकांच्या घरात घुसले, शिवाय रस्त्यावरील खड्डे आणि चिखल या समस्येने तोंड वर काढले आहे. काही भागात नव्याने केलेले रस्तेही खचले आहेत.
शिमेर आगापूर येथे 200 वर्षापूर्वीचे वडाचे झाड कोसळले आहे. श्रीराम महागुरूदेव मंदिराजळ ही घटना घडली. यामुळे दोन वीज खांब देखील कोसळून त्यांचे नुकसान झाले आहे. झाड कोसळल्याने रस्ता देखील ब्लॉक झाला असून, त्याचा वाहतुकीवर देखील परिणाम झाला आहे.
याशिवाय केपे-मडगाव मार्गाशेजारील पोर्तुगिजकालिन संरक्षक भिंतीचा काही कोसळला आहे. भिंतीच्या मध्यातील भाग खाली पडल्याने शेजारील भाग देखीळ केव्हाही कोसळू शकतो अशी भीती व्यक्त केली जात आहे.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
