गोव्यात पावलू ट्रॅव्हल्स बससेवा सुरू करणारे तिओतिनिओ परेरा अनंतात विलिन

पणजी: राज्याच्या पहिल्या विधानसभेचे सांत आंद्रेचे पहिले माजी आमदार तिओतिनिओ परेरा (91 वर्षे) यांचे काल बुधवारी पहाटे म्हापशातील खासगी इस्पितळात निधन झाले. गेले काही दिवस त्यांच्यावर उपचार सुरू होते. त्यांच्यावर म्हापसा येथील सेंट जेरोम चर्चच्या आवारातील दफनभूमीत गुरुवारी संध्याकाळी 4 वा. अंत्यसंस्कार केले जाणार आहेत. त्यांनी पावलू ट्रॅव्हल्स ही आंतरराज्य बससेवा सुरू केली होती व त्याचे ते मालक होते.

तिओतिनिओ परेरा हे 1963, 1967 व 1972 साली सांत आंद्रे मतदारसंघातून युनायटेड गोअन्सकडून (युगो) सतत तीनवेळा निवडून आले. पहिल्या विधानसभेचे आमदारांपैकी ते एक होते. सांताक्रुझमधून1977 च्या निवडणुकीत ते पराभूत झाले. 1980 साली काँग्रेसतर्फे निवडणूक लढविली व ते जिंकून आले. त्यांचा हा शेवटचा विजय होता. त्यानंतर त्यांनी 1984, 1994 व 2022 ची निवडणूक लढविली. मात्र, तिन्हीवेळी हार पत्करावी लागल्यानंतर त्यांनी राजकारणातून निवृत्ती घेतली.