Goa News: स्वच्छ भारत अभियानांतर्गत शौचालयाची दुरुस्ती होणार- दिगंबर कामत

Digambar Kamat: स्वच्छ भारत अभियांनातर्गत मडगावातील शौचालयाची दुरुस्ती करण्यात येणार असल्याचे आमदार दिगंबर कामत यांनी कालकोंडा येते शौचालयाच्या उद्‍घाटनप्रसंगी सांगितले. कालकोंडा येथे 14.70 लाख रुपये खर्च करुन बांधण्यात आलेल्या शौचालयाचे उद्‍घाटन करण्यात आले.

श्री कृष्ण मंदिरात आधार कार्ड शिबिराचा शुभारंभही केला. याप्रसंगी नगराध्यक्ष दामोदर शिरोडकर. उपनगराध्यक्ष दीपाली सावळ, नगरसेवक महेश आमोणकर व अन्य उपस्थित होते. या शिबिरांतर्गत ज्यांच्याकडे अजूनपर्यंत आधार कार्ड नाही, त्यांनी कार्ड करावे. उद्या हे शिबिर मालभाट येथील साईबाबा मंदिरात आयोजित करण्यात येणार आहे, अशी माहिती यावेळी आयोजकांतर्फे देण्यात आली.

आमदार कामत म्हणाले, केंद्र सरकारच्या स्वच्छ भारत अभियानांतर्गत मडगावमधील सर्व सार्वजनिक शौचालयांचे दुरुस्ती केली जाईल. हे काम दोन टप्प्यात केले जाणार आहे. पहिल्या टप्प्यासाठी सहा शौचालयाच्या दुरुस्तीसाठी राज्य व केंद्र सरकारने मान्यता दिली असून अनुदानही मंजूर केले आहे. दुसऱ्या टप्प्यांतील शौचालय दुरुस्तीचा प्रस्ताव नगरपालिकेतर्फे राज्य सरकारला पाठविण्यात येणार आहे.

मडगावात वाहन पार्किंग संदर्भात कडक उपाय योजिले जातील. आपण हल्लीच अधिकारी व वाहतूक पोलिसांसमवेत स्टेशन रोड भागाची पाहणी केली आहे. पुढील 15 दिवसात हा भाग स्वच्छ होईल. नियमांचे उल्लंघन करणाऱ्यावर कडक कारवाई केली जाईल, असेही नगराध्यक्षांनी सांगितले.

25 लाखांची वसुली!

नगरपालिकेने 12 दिवसात 25 लाख रुपयांची वसुली केल्याचे त्यांनी सांगितले. हे काम असेच चालू राहील, तेव्हा सर्व आस्थापनांनी, नागरिकांनी सहकार्य करावे, तसेच ज्यानी व्यापारी परवाना काढला नसेल, त्यांनी तो काढावा, असे आवाहनही नगराध्यक्षांनी केले.