Margao City: शहरातील 'त्या' इमारती कोसळून लोकांचा जीव घेण्याचा सरकारचा इरादा आहे का? इतिहासकारांचा संतप्त सवाल

Margao City: ऐतिहासिक महत्व प्राप्त झालेली आणि 118 वर्षे जुनी असलेली मडगाव नगरपालिकेची इमारत, कोमुनिडेड इमारत, हॉस्पिसिओ इमारत तसेच मडगाव अर्बन हेल्थ सेंटर सध्या अखेरच्या घटका मोजत असून त्या अस्तित्वासाठी धडपडत असल्याचे चित्र निर्माण झाले आहे.

या वारसा वास्तूंकडे प्रशासनाचे पूर्णत: दुर्लक्ष झाल्याने त्या कोसळण्याच्या मार्गावर आहेत. आम्ही हेरिटेज वास्तूंचे संरक्षण करत आहोत असे एका बाजूचे सरकार म्हणतेय पण मडगाव मधील ऐतिहासिक वास्तूंबाबत सरकार उदासीन असल्याचे दिसून आल्याचे इतिहासकार योगेश नागवेकर म्हणाले.

मडगावात आरोग्य केंद्राचा काही भाग गेल्या ऑगस्टमध्ये कोसळला होता त्याभागाचे अद्याप बांधकाम झालेले नसून सद्यस्थितीत तो अक्षरशः प्लास्टिकने झाकावा लागतोय. याशिवाय मडगाव नगरपालिकेची दुरुस्तीच्या प्रतीक्षेत असलेली इमारत पावसाळ्यात प्लास्टिकने झाकावी लागली होती. सरकार सर्व हेरिटेज वास्तू दुरुस्तीबाबत वेळ काढूपणाचे धोरण अवलंबत आहे.

प्रत्येक राष्ट्र आपला वारसा जपतो पण गोव्यात ते होताना दिसत नाहीय. हा प्रकार खूपच दुःखदायक आहे. गोवा हे जगप्रसिद्ध राज्य आहे, त्याचा वारसा, संस्कृती, वास्तुकला पाहण्यासाठी अनेक पर्यटक राज्याला भेट देतात.

मात्र ऐतिहासिक महत्व प्राप्त झालेल्या वारशांचे जतन करण्याकडे विद्यमान सरकार दुर्लक्ष करत असून या इमारती कोसळण्याचा आणि त्याखाली चिरडून माणसे मारण्याचा सरकारचा इरादा आहे का? असा सवाल योगेश नागवेकर यांनी केला आहे.