Goa FDA Raid: मडगाव परिसरात 'FDA'ची कारवाई; 65 हजारांची मिठाई जप्त

Goa FDA Raid: अन्न आणि औषध प्रशासन संचालनालयाच्या अधिकाऱ्यांनी अस्वच्छ वातावरणात नियमांचे पालन न करता तसेच विनापरवाना मिठाई व फरसाण तयार करणाऱ्या व विक्री करणाऱ्या आस्थापनांवर अचानक छापे टाकून कारवाई केली.

मडगाव, नुवे, आकें, बोर्डा, कुंकळ्ळी या भागांमध्ये केलेल्या कारवाईत 65 हजार रुपये किमतीची मिठाई व फरसाण जप्त केल्याची माहिती खात्यातर्फे देण्यात आली. यंदाच्या दिवाळीत लोकांना सुरक्षित मिठाई व फरसाण उपलब्ध व्हावे यासाठी ही कारवाई करण्यात आली.

ही मिठाईची दुकाने एफडीएच्या परवान्याविना अस्वच्छ वातावरणात चालविण्यात येत होती, असे खात्याच्या पत्रकात नमूद केले आहे. त्या दुकानांना नोटिसा बजावण्यात आल्या असून दुकाने बंद करण्यास सांगण्यात आले आहे. अशा प्रकारच्या मोहिमा सर्व तालुक्यांमध्ये सुरू असून मावा आणि अन्य मिठाईवर करडी नजर ठेवण्यात येत आहे.

14 व 15 ऑक्टोबर रोजी पाहणी करण्यात आलेल्या आस्थापनांमध्ये ललिता स्वीटस्‌, नुवें, बंगलोर अय्यंगार केक हाऊस, आर्लेम सर्कल, केक पॅलेस, बोर्डा, श्रीसाईराम हॉट चिप्स, आकें, जय अंबे स्वीट मार्ट, कुंकळ्ळी, विनायक बेकरी, कुंकळ्ळी, चंदन स्वीट मार्ट, आकें, राम स्वीट अँड फरसाण, कुंकळ्ळी, गुरुकृपा स्वीट अँड फरसाण, कुंकळ्ळी, सोळंकी स्वीटस्‌, कुंकळ्ळी तसेच तानाजी फरसाण, मडगाव यांच्याकडील फरसाणचे नमुने तपासणीसाठी नेण्यात आले.