Women's ODI Cricket Tournament: गोव्याच्या महिलांना आत्मघात नडला

Women's ODI Cricket Tournament: सीनियर महिला एकदिवसीय क्रिकेट स्पर्धेत सलग तीन सामने जिंकल्यामुळे गोव्याच्या महिलांचा आत्मविश्वास कमालीचा उंचावला होता. मात्र हरियानाविरुद्ध त्यांच्या बॅट्सवूमनचा आत्मघात नडला व स्पर्धेतील पहिल्या पराभवास सामोरे जावे लागले.

सामना बुधवारी मंगलापुरम-त्रिवेंद्रम येथील केरळ क्रिकेट असोसिएशनच्या मैदानावर झाला. नाणेफेक जिंकून गोव्याने प्रथम फलंदाजी स्वीकारली.

8 विकेट 23 धावांत गमावल्यामुळे गोव्याचा डाव 153 धावांत आटोपला. नंतर हरियानाने सोनिया मंधिया (38) व कर्णधार शीतल राणा (नाबाद ५२) यांच्या चमकदार फलंदाजीच्या जोरावर ५ विकेटच्या मोबदल्यात १५७ धावा करून सामना जिंकला.

श्रेया परब (४१ धावा, ५० चेंडू, ५ चौकार) व विनवी गुरव (५९ धावा, ६९ चेंडू, ८ चौकार) यांनी दुसऱ्या विकेटसाठी केलेली ८५ धावांची भागीदारी, तसेच विनवी गुरव व कर्णधार शिखा पांडे (२७ धावा, २८ चेंडू, ४ चौकार) यांनी तिसऱ्या विकेटसाठी केलेल्या ४५ धावांच्या भागीदारीमुळे गोव्याचा संघ २ बाद १३० असा सुस्थितीत होता.

नंतर शिखा बाद झाल्यानंतर २३ धावांत गोव्याचा डाव अनपेक्षितपणे संपुष्टात आला. हरियानाच्या शीतल राणा (३-३०) व सोनिया मंधिया (४-१८) यांच्यासमोर गोव्याच्या बॅट्सवूमननी नांगी टाकली.

संक्षिप्त धावफलक

गोवा: ३५.४ षटकांत सर्वबाद १५३ (तेजस्विनी दुर्गड ०, श्रेया परब ४१, विनवी गुरव ५९, शिखा पांडे २७, तरन्नुम पठाण ०, सुनंदा येत्रेकर ०, पूर्वा भाईडकर १, दिव्या नाईक ९, निकिता मळीक ४, प्रियांका कौशल ०, दीक्षा गावडे नाबाद ०, शीतल राणा ३-३०, सोनिया मंधिया ४-१८) पराभूत वि. हरियाना: ३९.५ षटकांत ५ बाद १५७ (सोनिया मंधिया ३८, शीतल राणा नाबाद ५२, शिखा पांडे ६-१-२१-०, निकिता मळीक ३-१-१४-१, तरन्नुम पठाण १०-२-३४-२, पूर्वा भाईडकर ३-०-१३-०, सुनंदा येत्रेकर ९.५-१-३०-१, दीक्षा गावडे ५-०-२७-१, प्रियांका कौशल ३-०-१४-०).