C. K. Nayudu Trophy: आंध्रचा सहाशे धावांचा डोंगर

C. K Nayudu Trophy: द्विशतकवीर के. रेवंत रेड्डी याच्यासह आंध्रच्या एकूण चौघा फलंदाजांनी शतके नोंदविली. त्या बळावर कर्नल सी. के. नायडू करंडक 23 वर्षांखालील क्रिकेट सामन्याच्या दुसऱ्या दिवसअखेर त्यांनी गोव्याविरुद्ध पहिल्या डावात 4 गडी गमावून 606 धावांचा डोंगर उभारला.

कडापा येथील वायएस राजा रेड्डी आंध्र क्रिकेट असोसिएशन स्टेडियमवर सामना सुरू आहे. अंधूक प्रकाश व पाऊस यामुळे सोमवारी चहापानानंतरचा खेळ होऊ शकला नाही.

आंध्रने सामन्याच्या पहिल्या दिवशी रविवारी २ बाद ४०४ धावा केल्या होत्या. १६४ धावांवरून रेवंत रेड्डी याने सोमवारी शानदार द्विशतक नोंदविले. त्याने आक्रमक शैलीच्या एम. हेमंत रेड्डी याच्यासमेवत तिसऱ्या विकेटसाठी १७९ धावांची भागीदारी केली.

शुभम तारीच्या गोलंदाजीवर कौशल हट्टंगडी याच्या हाती झेल दिलेल्या हेमंतने शतक नोंदविले. त्याने १२३ चेंडूंत १३ चौकार व चार षटकारांच्या मदतीने १२१ धावा केल्या. रेवंत २२० धावांवर बाद झाला.

राहुल मेहताच्या गोलंदाजीवर शिवेंद्र भुजबळने यष्टिचीत केलेल्या रेवंतने ३७३ चेंडूंत २५ चौकारांच्या साह्याने चमकदार खेळी केली. त्याने एम. के. दत्ता याच्यासमवेत चौथ्या विकेटसाठी १२२ धावांची भागीदारी केली.

झंझावाती फलंदाजी केलेला दत्ता दिवसअखेर १०२ धावांवर नाबाद राहिला. त्याने ८६ चेंडूंतील खेळीत ७ चौकार व तेवढेच षटकार मारले. काल वामशी कृष्ण(१३९) यानेही शतक केले होते.

संक्षिप्त धावफलक

आंध्र, पहिला डाव (२ बाद ४०४ वरून) १२४ षटकांत ४ बाद ६०६ (के. रेवंत रेड्डी २२०, वामशी कृष्ण १३९, एम. हेमंत रेड्डी १२१, एम. के. दत्ता नाबाद १०२, शुभम तारी २२-१-८६-१, लखमेश पावणे २०-३-७३-०, मनीष काकोडे २६-२-१५२-२, दीप कसवणकर १७-२-९१-०, अभिनव तेजराणा ८-०-३२-०, योगेश कवठणकर १६-०-९०-०, राहुल मेहता १४-०-७२-१, आयुष वेर्लेकर १-०-१-०).