मराठी - कोकणी वाद आणखी चिघळणार? मावजोंच्या समर्थनात भेंब्रेंचा Video, 'शांत बसणार नाही', म्हणत इशारा

Marathi- Konkani Controversy

पणजी: गोव्यात गेल्या काही दिवसांपासून मराठी आणि कोकणी भाषेचा वाद सुरु आहे. गोव्यातील काही विचारवंत, सामाजिक कार्यकर्ते वेळोवेळी या वादाला अनुसरून मत व्यक्त करत असतात.

आज देखील गोव्यातील साहित्यिक उदय भेंब्रे यांनी "मावजो यांनी माफी का मागावी?" अशी प्रतिक्रिया व्यक्त करत युट्युबवर एक व्हिडीओ शेअर केला आहे.

उदय भेंब्रे त्यांच्या सदर युट्युब व्हिडिओमधून कोकणीचा राजभाषा कायद्यात असलेला उल्लेख व्यक्त करत अशी भाषा केवळ बोलीभाषा कशी असू शकते असे सवाल उपस्थित केला. त्यांच्या म्हणण्यानुसार गोव्यातील ९५ टक्के स्थनिक कोकणी भाषा बोलतात आणि म्हणूनच मावजो यांनी कोकणीला राज्य भाषेचा दर्जा मिळावा असे केलेले विधान इतर भाषेचा अपमान ठरत नाही.

याउलट मराठीवादी लोकांच्या मनात असलेल्या अहंगंडामुळे ते कोकणी भाषेचा तिरस्कार करीत असल्याचे रोखठोक विधान केले आहे.

डॉ. अनुजा जोशी यांनी कोकणीचा बोली भाषा म्हणून केलेला उल्लेख हा केवळ मावजो यांचा अपमान नाही तर समस्त कोकणी समाजाच अपमान असून यानंतर कोकणी विरोधात असे विधान करताना दोनवेळा विचार केला जावा कारण शांत असलेला कोकणी समाज हा प्रत्येकवेळी शांत बसणार नाही असे म्हणत त्यांनी मराठीप्रेमी लोकांना इशारा दिला.

सदर व्हिडिओमध्ये ते डॉ. अनुजा जोशी या स्वतः मराठी भाषिक असल्यामुळे कोकणीच्या विरोधात वक्तव्य करीत आहेत असा उल्लेख केला, त्यांच्यासारख्या साहित्यिकेने अशा प्रकारे इतर भाषेचा तिरस्कार करणे योग्य नाही असे म्हणत त्यांनी मराठीवादी समाजाला थेट उत्तर दिले आहे.

जसा इतर प्रदेशातील लोकांना त्यांच्या संबंधित भाषांचा अभिमान असतो तसाच गोव्यातील लोकांना कोकणीचा अभिमान असल्याने डॉ. अनुजा जोशी यांनी स्थानिकांच्या भावना दुखावल्यामुळे माफी मागितली पाहिजे असे वक्तव्य केले आहे.