Goa News: म्हापशातील ‘त्या’ नगरसेवकांची शिर्डी सहल बनली चर्चेचा विषय!

Goa News: येथील पालिका बाजारातील सोपो कंत्राटदाराकडून कथित लाच मागितल्याची तक्रार पालिकेतील चार नगरसेवकांविरुद्ध पालिका मुख्याधिकारी यांच्याकडे केल्यानंतर चौकशीचा मुख्याधिकारी पत्ता न लावताच चक्क तो आरोप असलेल्याच नगरसेवकांसोबत शिर्डी येथे सहलीला गेल्यामुळे शहरात हा चर्चेचा विषय ठरला.

मुख्याधिकारी अमितेश शिरवईकर यांच्याकडे पालिका बाजारातील सोपो कंत्राटदार शिरोडकर यांनी पालिका बाजार समितीचे अध्यक्ष नगरसेवक विराज फडके, नगरसेवक आशीर्वाद खोर्जुवेकर, स्वप्नील शिरोडकर यांच्याविरुद्ध कथित लाच मागत असल्याचा दावा करीत तक्रार केली होती. याची मुख्याधिकाऱ्‍यांनी दखल न घेता सत्ताधारी गटाला पाठीशी घालण्याचा प्रयत्न केल्याचे या प्रकारातून बोलले जात आहे.

नगरसेवकांत संताप

सोपो कंत्राटदाराकडून लाच मागितल्याचा कथित आरोप असलेल्या नगरसेवकांसोबत मुख्याधिकारी शिरवईकर सहलीला गेल्यामुळे पालिकेतील कर्मचाऱ्‍यांमध्ये चर्चा चालू आहे. तक्रारीची दखल घेण्याचे सोडून कथित आरोप असलेल्या नगरसेवकांसोबत मौजमजा करण्यासाठी ते गेल्यामुळे सत्ताधारी तसेच विरोधी नगरसेवकांनी संताप व्यक्त केला आहे.