Sanjay Barde Statement on Pravin Arlekar: आमदार प्रवीण आर्लेकरांवर पाण्‍याच्या चोरीचा आरोप; नेमकं प्रकरण काय?

Sanjay Barde Statement on Pravin Arlekar: मीटरविनाच घरात पाण्याचे कनेक्शन घेतल्याचा आरोप करीत काँग्रेसचे प्रवक्ते संजय बर्डे यांनी पेडणेचे आमदार प्रवीण आर्लेकर यांच्‍यावर निशाणा साधला. या संपूर्ण प्रकाराची सखोल चौकशीची मागणी करीत आर्लेकरांविरोधात आपण अपात्रता याचिका दाखल करणार असल्याचे बर्डे यांनी आज येथे सांगितले. काँग्रेस कार्यालयात आयोजित या पत्रकार परिषदला सीतेश मोरे हेही उपस्‍थित होते.

आर्लेकर यांचे धारगळ येथे घर आहे आणि याच घराचा पत्ता त्यांनी विधानसभा निवडणुकीच्या प्रतिज्ञापत्रात दिलेला आहे. या घरास पाण्याचा मीटर नसताना तिथे जोडणी घेतली गेली आहे. याबाबत आपण राज्य निवडणूक आयोग तसेच संबंधितांकडे लेखी तक्रार करून आर्लेकरांविरोधात अपात्रता याचिका दाखल करणार असल्याचे बर्डे म्‍हणाले.

दोन दिवसांपूर्वी याप्रश्‍‍नी पोलिसांत तक्रार दाखल केली होती. त्‍यानंतर ताबडतोब काल रविवारी नळजोडणी परस्पर कापण्यात आली. याचाच अर्थ हा बेकायदा प्रकार असून गेली अनेक वर्षे पाण्याची चोरी करण्‍यात आलेली आहे, असा आरोप बर्डे यांनी केला.