Goa News: म्हापसा पालिका कर्मचाऱ्यांची काळी पट्टी बांधत मूक निदर्शने!

Goa News: म्हापसा येथील नगरपालिका कर्मचाऱ्यांनी आपल्या प्रलंबित मागण्यांसाठी येत्या 10 ऑक्टोबरपासून बेमुदत संपावर जाण्याची नोटीस यापूर्वीच पालिकेला दिली आहे. मात्र, पालिका मंडळ ठोस निर्णय घेत नसल्याच्या निषेधार्थ या कर्मचाऱ्यांनी कालपासून दंडाला काळी पट्टी बांधून निषेध व्यक्त केला. ही मूकनिदर्शने 9 ऑक्टोबरपर्यंत दुपारी जेवणाच्या सुट्टीत केली जातील.

पालिका कर्मचारी संघटनेने म्हापसा पालिका मंडळाला जूनमध्‍ये 19 कलमी मागणीपत्र (चार्टड ऑफ डिमांड) सादर करून ते पूर्ण करण्याची केली होती. कर्मचारी संघटना व नगरपालिका यांच्‍यातील चार्टड ऑफ डिमांड करारपत्राची मुदत सप्टेंबर 2021मध्ये संपुष्टात आली आहे. या करारपपत्राचे नूतनीकरण करण्याची मागणीही संघटनेने केली आहे.

परंतु अजून त्‍याची पूर्तता न झाल्‍यामुळे अखिल गोवा पालिका कर्मचारी संघटनेने म्‍हापसा पालिकेला बेमुदत संपाची नोटीस दिली आहे. या नोटिशीची प्रत पालिका संचालनालय, मुख्यमंत्री, नगरविकासमंत्री, उपसभापती, मुख्य सचिव, पालिका खात्याचे सचिव, कामगार आयुक्त व कामगार खात्याच्या सचिवांना पाठवली आहे. पण पालिका तसेच कामगार आयुक्तांसह वरील एकाही खात्याकडून संघटनेच्या या नोटिशीला उत्तर मिळालेले नाही.