गेल्या वर्षी वाहतूक मंत्री माविन गुदिन्हो यांनी पुढील 20 वर्षात गोव्यात तिसऱ्या विमानतळाची गरज निर्माण होईल, असे वक्तव्य केले होते. राज्यातील पर्यटनाला वाढती पसंती लक्षात घेता तिसऱ्या विमानतळाची गरज भासेल असा दावा त्यांनी केला होता.
दरम्यान, अलिकडे दाबोळी विमानतळ बंद होण्याची भीती विरोधकांकडून व्यक्त केली जात असताना राज्य सरकारमधील दोन मंत्र्यांनी तिसऱ्या विमानतळाची गरज असल्याचे वक्तव्य केले आहे.
राज्याचे कृषिमंत्री आणि फोंड्याचे आमदार रवी नाईक नेहमीच्या त्यांच्या हटके विधानांसाठी चर्चेत असतात. दाबोळीवरुन वाद सुरु असल्याने त्यांना प्रश्न विचारला असता, दाबोळी विमानतळ बंद होणार नाही. दाबोळी आणि मोपा दोन्ही विमानतळ चालू राहणार असल्याचा विश्वास त्यांनी व्यक्त केला.
तसेच, भविष्यात गोव्यात येणाऱ्या पर्यटकांची संख्या वाढणार असल्यानं गोव्यात तिसऱ्या विमानतळाची गरज भासणार आहे, असे मत त्यांनी व्यक्त केले. यापूर्वी त्यांनी गोव्यात तिसऱ्या जिल्ह्याची गरज असल्याचे मत व्यक्त केले होते.
दरम्यान, राज्याचे वीज खात्याचे मंत्री सुदिन ढवळीकर यांनी देखील तिसऱ्या विमानतळाबाबत सकारात्मक मत व्यक्त केले आहे. मंत्री सुदिन ढवळीकारांनीही पुढल्या 10 वर्षात राज्यात तिसऱ्या विमानतळाची गरज असल्याचे भाष्य केले आहे.
तिसऱ्या विमानतळाची मागणी काणकोण तालुक्यात केली जाऊ शकते असे भाकितही ढवळीकरांनी केले आहे.
कतार एअरवेजने येत्या 20 जूनपासून फ्लाईट ऑपरेशन दाबोळीवरुन मोपावर वळविण्याची घोषणा केली. मोपावर कामकाज स्थलांतरित करणार कतार एअरवेज तिसरी कंपनी ठरली आहे. यामुळे राज्य सरकार दाबोळी बंद करण्याच्या प्रयत्नात असल्याचा आरोप विरोधकांकडून केला जात आहे.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.