मोरजीत जमावाच्या मारहाणीत मनोरुग्ण तरुणाचा मृत्यू; कांदोळीत कार जळून खाक गोव्यातील ठळक बातम्या

कांदोळीत GA 03 W 6201 क्रमांकाची कार जळून खाक झाली आहे. राफेल पीटर फर्नांडिस यांच्या मालकीची ही कार असल्याची माहिती समोर आली आहे. पिळर्ण अग्निशमन दलाच्या जवानांनी आगीवर नियंत्रण मिळवले. यात कोणीही जखमी झाले झाले नाही.

सावर्डे भाजप मंडळ अध्यक्ष विलास देसाई, दीपक पाऊस्कर, विनय तेंडुलकर यांच्यासह कुळे दूधसागर जीप टुर ऑपरेटर्सचे सर्व पदाधिकाऱ्यांनी घेतली भाजप प्रदेशाध्यक्ष सदानंद तानावडे यांची भेट. तानावडेंची यासंदर्भात मुख्यमंत्र्यांशी सकोल चर्चा. मुख्यमंत्री यासंदर्भात लवकरच तोडगा काढणार असल्याचे आश्वासन. दुधसागर पर्यटन हंगाम २ नोव्हेंबर पासून सुरू होण्याची शक्यता.

म्हापसा येथे काजू दुकानात चोरीची घटना उघडाकीस आली असून, वीस हजारांचा मुद्देमाल लंपास झाला आहे. याप्रकरणी पोलिसांत गुन्हा नोंद करण्यात आला असून, अधिक तपास सुरु आहे.

पावसाचा पुन्हा कहर. विजांचा लखलखाट आणि ढगांच्या गडगडाटासह डिचोलीत वादळी पावसाची हजेरी. भर दिवाळीच्या दिवशी उत्साहावर पावसाचे पाणी. बाजार विस्कळीत. विक्रेत्यांची उडाली तारांबळ.

मोरजी येथे जमावाच्या मारहाणीत जखमी झालेला नितेश सदानंद परब (वय वर्ष 38) या मनोरुग्ण तरुणाचा उपचारादरम्यान मृत्यू झाला. मांद्रे पोलिसांकडून तपास सुरु. मंगळवारी रात्री घटना घडली होती.

राज्यात नोकरी देण्याच्या बहाण्याने गोमंतकीयांच्या फसवणूकीचे प्रकरणे सातत्याने समोर येतायेत. याचीच दखल घेत मुख्यमंत्री डॉ. प्रमोद सावंत यांनी नोकरीसाठी पैसे मागणाऱ्यांपासून सावध राहण्याचे आवाहन केले आहे.

पर्वरी येथून एक धक्कादायक बातमी समोर आली आहे. एका 18 वर्षीय तरुणीचा दुमजली इमारतीच्या टेरेसवरुन पडून मृत्यू झाला.

हणजूण येथील भूमिका मंदिराजवळील एका घराला रात्री काल (30 ऑक्टोबर) 11.53 च्या सुमारास आग लागली. सब ऑफिसर डी. एस. सावंत यांच्या नेतृत्वाखालील म्हापसा अग्निशमन दल तात्काळ घटनास्थळी पोहोचले. आग यशस्वीपणे आटोक्यात आणण्यात आली. आगीत कोणत्याही प्रकारची जीवीतहानी झाली नाही. आगीत तब्बल 2 लाखांचे नुकसान झाल्याचा अंदाज आहे.

पर्यटक पोलीस आणि कळंगुट पोलीस यांनी बागा ते सिक्वेरीपर्यंत राबवलेल्या विशेष मोहिमेत समुद्रकिनारी गैरप्रकार करणाऱ्या 9 दलाल आणि 7 महिला फेरीवाल्यांना अटक करण्यात आली.

गोवा मानवाधिकार आयोगाने तंबी देऊनही पणजी, ताळगांव परिसरात रात्री 11 नंतर नरकासूरांच्या नावाने कर्णकर्कश डीजे संगीत सुरुच. पणजी, ताळगांवतील काही जेष्ठ नागरिकांवर रात्री झोपण्यासाठी इतरत्र जाण्याची वेळ. पोलिसांच्या भूमिकेवर अनेकांकडून प्रश्नचिन्ह उपस्थित.