Leopard In Goa: जंगली श्वापदांचा मानवी वस्तीकडे वावर वाढत चालला असून काल शनिवारी रात्रौच्या सुमारास काणकोण खोतीगाव येथे बिबट्याने पाळीव कुत्र्यावर हल्ला करून त्याला जखमी केल्याची घटना घडली आहे. या घटनेत कुत्रा घायाळ झाला असून त्याच्या गळ्याला बिबट्याने चावा घेतलाय. सदरच्या घटनेमुळे स्थानिकांमध्ये भीतीचे वातावरण तयार झाले आहे.
राज्यातील वन क्षेत्राची घटत जाणारी सीमा, जंगलातील अपुरा पाणी साठा तसेच भक्ष्य न मिळणे या आणि अशा अनेक कारणांसाठी जंगली प्राणी मानवी वस्तीकडे फिरू लागले आहेत.
वन्यजीव तज्ञांनी बिबट्या आणि वाघांच्या पशुधनावरील हल्ल्यांना रोखण्यासाठी तातडीच्या उपाययोजना करण्याचे आवाहन केले आहे.
गेल्या काही महिन्यात सत्तरी आणि धारबांदोडा येथील म्हादई खोऱ्यात अशा घटनांमध्ये वाढ झाली आहे. शिकार उपलब्ध नसल्याने अशा घटनामध्ये वाढ होत असल्याचे वन्यजीव तज्ञांनी म्हटले आहे.
वन्यजीव जीवशास्त्रज्ञ ए जे टी जॉनसिंग यांनी राज्याच्या वन विभागाला एक अहवाल सादर केला. वाघांना जंगलात परत आणण्यासाठी वन क्षेत्रात सांबरांची संख्या वाढवणे यासारख्या उपाययोजना जॉनसिंग यांनी सुचवल्या आहेत.
या दिशेने कोणतेही प्रामाणिक प्रयत्न झाले नाहीत, त्यामुळे बिबट्या आणि वाघ पाळीव प्राण्यांवर हल्ले करताहेत. असे जॉनसिंग यांनी म्हटले आहे.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.