Karnataka Bus Accident At Goa: चालकाच्या डुलकीने झाला अपघात, आगशी वळणावर बस कलंडली

Karnataka Bus Accident At Goa राज्यात अपघातांचे सत्र सुरूच असून आगशी उड्डाणपुलावर आंतरराज्य बसला पहाटे ५.३० वाजण्याच्या सुमारास अपघात झाला. बसचालकाला अचानक डुलकी लागल्याने त्याचे वाहनावरील नियंत्रण सुटले आणि एका तीव्र वळणावर बस कलंडली.

सुदैवाने यात जीवितहानी झाली नाही. मात्र, काही प्रवासी किरकोळ जखमी झाले. आगशी पोलिसांनी बसचालकाला ताब्यात घेतले आहे.

केए-०१-एजे-२४६२ या क्रमांकाची बस बंगळुरू ते पणजी असा प्रवास करत होती. सीबर्ड कंपनीची ही बस आज पहाटे मडगावहून सुटल्यानंतर शेवटचा थांबा घेण्यासाठी जात असताना नवीन झुआरी पुलाच्या आगशी येथील उड्डाण पुलावरून सर्व्हिस रस्त्यावर येण्याचा प्रयत्न करताना डुलकी लागल्याने चालकाचा बसवरील ताबा सुटला.

ही बस डाव्या बाजूला कलंडली. अपघातावेळी बसमध्ये १८ प्रवासी होते. मात्र, सुदैवाने जीवितहानी झाली नाही. काही प्रवासी किरकोळ जखमी झाले, अशी माहिती पोलिसांनी दिली. या प्रकरणाचा तपास हवालदार उदय पालकर करत आहेत.

चालकाची केली मद्यचाचणी

सकाळी सुमारे ७.३० वाजण्याच्या सुमारास पोलिस नियंत्रण कक्षाला या अपघाताची सूचना देण्यात आली होती. त्यानंतर पोलिस घटनास्थळी पोहचून त्यांनी पंचनामा केला. बस अतिवेगाने वळण घेत असल्याने हा अपघात झाल्याचा अंदाज पोलिसांनी व्यक्त केला. बसचालकाने मद्यपान केले होते का, हे तपासण्यासाठी आगशी पोलिसांनी त्याची गोमेकॉत तपासणी केली आहे.