Goa Kala Academy: कला अकादमीसाठी तियात्रिस्तही आक्रमक! राज्यव्यापी आंदोलनाचा निर्धार

डॉ. प्रमोद सावंत सरकार हे कला आणि कलाकारांच्या विरोधी आहे. फक्त इव्हेंटचा मलिदा खाणाऱ्या या सरकारचे कलाकारांशी काहीच देणे-घेणे नाही. या सरकारला वठणीवर आणण्यासाठी आता कलाकारांनीच पुढाकार घ्यावा. कला अकादमीच्या निनित्ताने सुरू झालेले हे आंदोलन आता राज्यव्यापी करण्याचा निर्धार आज मडगावातील सभेत व्यक्त करण्यात आला.

कलाराखण मांड या नावाने आयोजिलेल्या आजच्या या सभेला विविध क्षेत्रांतील कलाकार आणि कार्यकर्त्यांनी भाग घेतला होता. कलाकारांना पाठिंबा देण्यासाठी विरोधी पक्षांचे नेतेही उपस्थित होते. महत्त्वाचे म्हणजे आतापर्यंत या आंदोलनापासून तियात्र कलाकार अलीप्त राहिले होते; पण आजच्या या सभेला उपस्थित असलेल्या तियात्रिस्तांनी या आंदोलनाला जाहीर पाठिंबा दर्शविला आहे.

विरोधी पक्षनेते युरी आलेमाव यांनी हा प्रश्न विधानसभेच्या पटलावर आणून आवाज उठविण्याचे आश्वासन दिले. यावेळी काँग्रेस प्रदेशाध्यक्ष अमित पाटकर, काँग्रेस आमदार एल्टन डिकॉस्ता, ‘आप’चे आमदार क्रुझ सिल्वा हेही उपस्थित होते.  

यावेळी कला अकादमीच्या बांधकामात वेळोवेळी कसा घोळ झाला,  याचे सादरीकरण  ‘द चार्लस कुर्रैया फाऊंडेशन’तर्फे तन्वी कारिया यांनी सादर केले.  ही सभा व सादरीकरण आज मडगावात गोमंत विद्या निकेतनच्या ॲम्फी थिएटरमध्ये झाले.  कला अकादमीचे नूतनीकरण करताना कलाकारांना विश्वासात घेतलेच नाही आणि तिथेच सगळे चुकले, असा आरोप करण्यात आला.

तियात्र पाहण्यासाठी येतात साप

यावेळी प्रसिद्ध तियात्रिस्त रोझफर्न यांनी आमचा संपूर्ण पाठिंबा तुम्हाला असेल असे वचन दिले, तर फ्रान्सिस द तुये यांनी आपल्या राजकीय कांतारातून सरकारचे वाभाडे काढताना आता सरकारी थिएटरमध्ये तियात्र पाहण्यासाठी सापही येऊ लागले आहेत, अशी कोपरखळी हाणली.

हस्तक्षेप याचिका दाखल करा!

गोवा फॉरवर्ड पक्षाचे अध्यक्ष विजय सरदेसाई म्हणाले, कला अकादमीप्रश्र्नी  न्यायालयाचे दरवाजे ठोठावल्याशिवाय  दुसरा पर्याय नाही. मी याप्रकरणी यापूर्वीच उच्च न्यायालयात याचिका दाखल केली आहे. आता राज्यातील कलाकारांनी हस्तक्षेप याचिका दाखल करून स्वतः त्यात सहभागी व्हावे, असे आवाहन आमदार विजय सरदेसाई यांनी केले.