'गोव्याची प्रतिमा धोक्यात येतेय!', 'कामसूत्र अँड ख्रिसमस' कार्यक्रमाचे आयोजन; महिला मंचाचा कडक आक्षेप

मडगाव: गोव्यामध्ये २५ ते २८ डिसेंबर या कालावधीत प्रस्तावित असलेल्या 'टेल्स ऑफ कामसूत्र अँड ख्रिसमस सेलिब्रेशन' (Tales of Kamasutra & Christmas Celebration) नावाच्या एका कार्यक्रमावर 'गोवा महिला मंचाने' (Goa Women's Forum - GWF) तीव्र आक्षेप घेतला आहे. या वादग्रस्त कार्यक्रमामुळे गोव्याची 'कौटुंबिक पर्यटन स्थळ' ही प्रतिमा डागाळून राज्याची ओळख 'लैंगिक पर्यटन स्थळ' म्हणून होण्याची भीती मंचाने व्यक्त केली आहे.

पर्यटन संचालकांना थेट पत्र; 'गोव्याची प्रतिमा खराब होईल'

गोवा महिला मंचाच्या निमंत्रक लॉर्ना फर्नांडिस यांनी राज्याचे पर्यटन संचालक केदार नाईक यांना याबाबत एक सविस्तर पत्र लिहिले आहे. या पत्रानुसार, अशा प्रकारच्या उपक्रमांना गोव्यात प्रोत्साहन देणे अत्यंत निषेधार्ह आहे. हा कार्यक्रम म्हणजे गोव्याच्या संस्कृतीचे आणि येथील लोकांच्या भावनांचे विकृत सादरीकरण करण्यासारखे आहे.

ख्रिसमसच्या काळात आयोजित होत असलेल्या या कार्यक्रमामुळे गोवा लैंगिक पर्यटन स्थळ म्हणून प्रसिद्ध होईल आणि कौटुंबिक पर्यटन स्थळ म्हणून गोव्याची प्रतिमा खराब होईल, अशी भीती लॉर्ना फर्नांडिस यांनी व्यक्त केली आहे.

शुल्क आकारणी आणि आयोजक संस्थेची चौकशीची मागणी

या कार्यक्रमाचे आयोजन 'भगवान श्री रजनीश फाउंडेशन' या संस्थेकडून करण्यात येणार असल्याची एक जाहिरात सध्या समाज माध्यमांवर फिरत आहे. या जाहिरातीनुसार, या कार्यक्रमास उपस्थित राहण्यासाठी आणि जेवणासाठी प्रत्येक सहभागीकडून तब्बल २४,९९५/- इतके शुल्क घेण्यात येत आहे.

गोवा महिला मंचाने या आयोजक संस्थेवर तातडीने कठोर कारवाई करण्याची मागणी केली असून खालील मागण्या केल्या आहेत:

• आयोजक संस्था 'भगवान श्री रजनीश फाउंडेशन'ची सत्यता, तसेच कार्यक्रमाचे ठिकाण आणि इतर तपशील त्वरित तपासून त्यांची पडताळणी करावी.

• कार्यक्रमाच्या आयोजकांविरुद्ध तातडीने प्रथम माहिती अहवाल दाखल करून कायदेशीर कार्यवाही सुरू करावी.

• प्रत्येक सहभागीकडून २४,९९५/- इतके शुल्क आकारले जात आहे. या शुल्क संकलनाची देखील सखोल चौकशी व्हावी.

सर्वोच्च प्रशासकीय अधिकाऱ्यांपर्यंत तक्रार

या गंभीर प्रकरणाचे गांभीर्य लक्षात घेऊन, गोवा महिला मंचाने त्यांच्या पत्राच्या प्रती राज्याचे मुख्य सचिव, संबंधित जिल्हाधिकारी, दोन्ही जिल्ह्यांचे पोलिस अधीक्षक, तसेच गोवा राज्य महिला आयोगाच्या अध्यक्ष आणि एआरझेड एनजीओचे संचालक यांच्याकडे देखील पाठवल्या आहेत.

या सर्व प्रशासकीय यंत्रणांनी यात लक्ष घालून त्वरित हस्तक्षेप करावा, अशी मागणी मंचाने केली आहे. गोवा हे नेहमीच शांत आणि कुटुंबासोबत भेट देण्यासारखे पर्यटनस्थळ म्हणून ओळखले जाते. त्यामुळे, अशा प्रकारच्या वादग्रस्त कार्यक्रमांना गोव्यात थारा नसावा, अशी भूमिका गोवा महिला मंचाने घेतली आहे. प्रशासनाच्या पुढील भूमिकेकडे आता सगळ्यांचे लक्ष लागले आहे.