Goa Mines: नार्वेत बेकायदा चिरेखाणीवर छापा

Goa Mines: खाण आणि भूगर्भ खात्याने केलेल्या एका कारवाईत नार्वे गावातील देवगळी परिसरात बेकायदेशीरपणे चालू असलेल्या एका चिरेखाणीवर छापा मारला.

या छाप्यावेळी अधिकाऱ्यांनी चिरेखाणीवरील यंत्रसामग्री जप्त केली. या कारवाईमुळे चिरे काढणाऱ्या व्यावसायिकांचे धाबे दणाणले आहेत.

पोलिसांच्या मदतीने ही कारवाई करण्यात आली. जप्त करण्यात आलेली यंत्रसामग्री सध्या पोलिसांच्या देखरेखीखाली ठेवण्यात आली आहेत. या बेकायदा व्यवसाय प्रकरणी मात्र कोणालाही अटक करण्यात आली नसल्याचे समजते.

नार्वेतील देवगळी परिसरात बेकायदेशीरपणे चिरे खाण चालत असल्याची तक्रार येताच खाण खात्याच्या अधिकाऱ्यांच्या पथकाने अचानक एका मोठ्या खाणीवर छापा टाकला.

यावेळी चिरे काढण्यासाठी वापरण्यात येणारी यंत्रसामग्री तसेच खाणीवर बसविण्यात आलेले जनरेटर जप्त करण्यात आले.

नार्वेत मोठ्या प्रमाणात चिरेखाणी:-

नार्वे गावातील देवगळी परिसरात कोमुनिदादच्या जागेत मोठ्या प्रमाणात बेकायदेशीरपणे चिरेखाणी चालत आहेत. चिरेखाणींमुळे देवगळी परिसर तर पुरता पोखरला गेला आहे. स्थानिकांसह गावाबाहेरील काहीजण या व्यवसायात आहेत.

यापूर्वीही या नार्वे गावातील चिरेखाणीवर कारवाई करण्यात आली आहे. तर या बेकायदा प्रकाराची दखल घेत नार्वे कोमुनिदादला दंडही ठोठावण्यात आला होता.

तरीदेखील या बेकायदा चिरेखाणी बंद झालेल्या नाहीत. कारवाई झाली, की काही दिवस चिरेखाणी बंद असतात. नंतर पुन्हा चिरेखाणीचा व्यवसाय जोरात सुरू होत असतो.