Goa Illegal Mining: काणकोण येथील बेकायदा चिरेखाणीवर खाण खात्याची मोठी कारवाई; 3 जणांना अटक

पणजी – काणकोण तालुक्यातील पर्येमळ-खोला परिसरात खाण खात्यानं छापा टाकत विनापरवाना सुरू असलेले चिरे उत्खनन उघडकीस आणले. खाण खात्याच्या अधिकाऱ्यांना या ठिकाणी पॉवर टिलर मशीनच्या साहाय्याने मोठ्या प्रमाणात अवैध उत्खनन सुरू असल्याचं आढळून आलं.

या प्रकरणी तिघांना अटक करण्यात आलीय. अटक करण्यात आलेल्यांमध्ये कुमार चालवाडी (रा. बागलकोट, कर्नाटक), संतोष सुरीन (रा. झारखंड) आणि नारायण (रा.झारखंड) यांचा समावेश आहे. या तिघांवर सरकारचे अंदाजे १० लाख रुपयांचे नुकसान केल्याचा आरोप आहे.

खाण खात्याच्या अधिकाऱ्यांना पर्येमळ-खोला भागात विनापरवाना चिरे उत्खनन सुरू असल्याची माहिती मिळाली होती. त्यानुसार त्यांनी विशेष पथक तयार करून छापा टाकला. तपासादरम्यान, आरोपी हे कोणत्याही अधिकृत परवानगीशिवाय पॉवर टिलर मशीनच्या साहाय्यानं मोठ्या प्रमाणावर चिरे उत्खनन करत असल्याचं निदर्शनास आलं.

प्राथमिक अंदाजानुसार, या कारवाईत जवळपास १० लाख रुपयांचे नुकसान झाल्याचे समोर आले आहे. तिन्ही आरोपींना अटक करण्यात आलीय.

राज्यात अनेक ठिकाणी विनापरवाना खनिज उत्खनन होत असल्याच्या तक्रारी मिळत आहेत. त्यामुळं खाण विभागानं अशा प्रकरणांवर कठोर कारवाई करण्यात येत आहे.