Goa News: गोंय टीबी मुक्त करुया! उसगाव, शिरोडा ग्रामपंचायतींनी जिंकला लढा; आरोग्य मंत्र्यांकडून कौतुक

Tuberculosis Free Campaign Goa

पणजी: पंतप्रधान नरेंद्र मोदी यांच्या ‘टीबी मुक्त पंचायत’ उपक्रमांतर्गत, पंचायतींना सक्रिय उपाययोजना करण्यासाठी सक्षम करण्यात आलेले आहे. गोव्यात क्षयरोगाच्या रुग्णांना मोफत निदान चाचण्या, उपचार सेवा आणि पोषण सहाय्य पुरविले जाते. गोव्याला ‘क्षय’मुक्त करण्यासाठी आम्ही कटिबद्ध आहोत, असे आरोग्यमंत्री विश्‍वजित राणे यांनी सांगितले.

दरम्यान, सोमवारी झालेल्या क्षयरोग मुक्त प्रचार मोहीम कार्यक्रमात उसगाव आणि शिरोडा दोन्ही ग्रामपंचायतींना ‘क्षय’मुक्त घोषित करण्यात आले. निक्षय पोषण योजनेंतर्गत थेट लाभ हस्तांतरणाचा असंख्य रुग्णांना लाभ झाला असून निक्षय मित्रांद्वारे पोषण किटचे वाटपही करण्यात आले आहे.

प्रसिद्ध अभिनेत्री वर्षा उसगावकर तसेच विनोदी अभिनेते जॉन डिसिल्वा यांनी क्षयरोग जागृती मोहिमेच्‍या जाहिरातीत काम केले असून त्यांनी ‘क्षयरोगमुक्त गोवा’साठी पुढाकार घेतला आहे. क्षय मुक्त भारत कार्यक्रमात क्षयरोगाविषयी जागरूकता वाढविण्यासाठी व्हिडिओ आणि रील मेकिंग स्पर्धेतील विजेत्यांना बक्षिसे देण्यात आली.

त्यांनी प्रसारमाध्यमांच्या शक्तीचा वापर करून क्षयरोगाविरुद्धच्या लढ्यात गोव्याच्या सुरू असलेल्या प्रयत्नांना ठळकपणे दाखवले. त्यांच्या व्हिडिओंनी केवळ लवकर निदान आणि उपचारांच्या महत्त्वावर भर दिला नाही तर ‘टीबी मुक्त पंचायत’ उपक्रमांतर्गत सामूहिक प्रयत्नांचे प्रदर्शनही केले आहे.

विश्वजित राणे म्हणाले की, वर्षा उसगावकर आणि आमचे कौटुंबिक संबंध आहेत. त्यांचे वडील आणि माझे वडील माजी मुख्यमंत्री भाऊसाहेब बांदोडकर यांच्या मंत्रिमंडळात एकत्र होते. त्यामुळे त्यांच्या वाढदिवसाला आम्ही एकत्र कुटुंब जात होतो. त्यांनी आज देशभरात नाव कमावले आहे. त्यामुळे त्यांनी सांगितलेली प्रत्येक गोष्ट लोकांना गंभीर वाटते आणि ते विचार करतात.