Goa Education: सुरक्षित आणि सक्षम गोवा! युवकांना रोजगाराभिमुख शिक्षण देणे हेच सरकारचे प्रमुख उद्दिष्ट; CM सावंत

पणजी: बॉयलर अटेंडंटसाठी नवीन संधी निर्माण करण्यासाठी आम्ही पुन्हा एकदा बॉयलर अटेंडन्स प्रशिक्षण प्रक्रिया सुरू केली आहे. यामुळे युवकांसाठी नवीन करिअरच्या संधी उपलब्ध होतील.

आम्ही शाळा आणि महाविद्यालयांत औद्योगिक सुरक्षा, विद्युत सुरक्षा, आपत्ती व्यवस्थापन व आपत्कालीन तयारी यांसारखे विविध प्रशिक्षण कार्यक्रम सुरू केले आहेत. 'सुरक्षित आणि सक्षम गोवा' हे या कार्यक्रमाचे ध्येय असून युवकांना रोजगाराभिमुख शिक्षण देणे हे सरकारचे प्रमुख उद्दिष्ट आहे, असे मुख्यमंत्री प्रमोद सावंत यांनी सांगितले.

बांबोळी येथील डॉ. श्यामा प्रसाद मुखर्जी इनडोअर स्टेडियममध्ये 'ऑक्युपेशनल सेफ्टी अँड हेल्थ एक्स्पो अँड समिट २०२५' या तीन दिवसांच्या भव्य उपक्रमाचे उद्घाटनप्रसंगी मुख्यमंत्री डॉ. प्रमोद सावंत यांनी उपरोक्त विचार व्यक्त केले. या उपक्रमात कारखाने आणि बाष्पक मंत्री नीळकंठ हळर्णकर, सचिव संजित रॉड्रिग्स, मुख्य निरीक्षक अनंत पांगम आणि इतर मान्यवर उपस्थित होते. या कार्यक्रमाचे आयोजन गोवा सरकारच्या कारखाने आणि बाष्पक निरीक्षक विभागाने केले आहे.

स्किल ऑन व्हील' उपक्रमाची घोषणा

मुख्यमंत्री सावंत यांनी 'स्किल ऑन व्हील" या अभिनव उपक्रमाचीही माहिती दिली. या उपक्रमांतर्गत एक मोबाइल ट्रेनिंग युनिट' पणजीहून ग्रामीण भागात जाईल आणि आधुनिक तंत्रज्ञान, साहित्य आणि शिकण्याच्या साधनांसह युवकांना प्रत्यक्ष प्रशिक्षण देईल. सुमारे २ कोर्टीचा निधी या उपक्रमासाठी मंजूर करण्यात आला आहे.