Governor P.S Shridhran Pillai: सर्वधर्मियांनी एकत्रित येऊन काम करण्याची गरज

Governor P.S Shridhran Pillai संपूर्ण मानवजाती ज्या आध्यात्मिक ध्येयांसाठी झटत आहे, ते ध्येय साध्य करण्यासाठी सर्व धर्मांनी एकत्रित काम करण्याची गरज आहे, असे सांगत राज्यपाल पी. एस. श्रीधरन पिल्लई यांनी गरीब आणि गरजूंना मदत करताना बिशप आल्वारीस मार ज्युलियस (प्रथम) यांच्या निःस्वार्थ सेवेची आठवण करून दिली.

ताळगाव येथील कम्युनिटी हॉलमध्ये शताब्दी स्मृतीप्रीत्यर्थ नुकत्याच आयोजित कार्यक्रमात राज्यपाल बोलत होते.

दरम्यान,2023-24 या वर्षीचा ‘अल्वारेस मार ज्युलियस पुरस्कार’ गरीब आणि आदिवासींच्या हक्कांसाठी झटणाऱ्या बहीण दयाबाई यांना प्रदान करण्यात आला.

राज्यपाल यांच्या हस्ते दयाबाईंना पुरस्कार, प्रशस्तिपत्र आणि रोख पुरस्कार प्रदान करण्यात आला.

राज्यपालांनी आपल्या भाषणात देशातील आध्यात्मिक वारशाचे स्मरण करून दिले. ‘एकम सत् विप्र बहुधा वदन्ति’ या आदर्शाने विविधतेतील एकता जोपासल्याचे सांगितले.

एच. एच. बासिलोस मार्थोमा मॅथ्युज (तृतीय) यांनी भाषणात आल्वारीस मार ज्युलियस यांच्या जीवनावर प्रकाश टाकला. ते म्हणाले, गरिबांची सेवा करणे आणि चर्चला समर्पण करणे हे संकट काळातही अनेकांसाठी प्रेरणादायी आहे.

देशभरातून हजारोंची उपस्थिती

सांतिनेज येथील स्मशानभूमीपासून पदयात्रा काढण्यात आली होती. सेंट मेरी ऑर्थोडॉक्स सीरियन चर्चमध्ये बिशप ज्युलियस यांना दफन करण्यात आले होते, त्या ठिकाणापर्यंत ही पदयात्रा होती.

रायबंदर चर्चचे फा. वर्गीस फिलीफोस यांचे स्वागतपर भाषण झाले. संयोजक रेजू आलेक्स यांनी आभार मानले. या कार्यक्रमास देशभरातून हजारो लोक उपस्थित होते.