Goa new GI tag products: गोव्याच्या समृद्ध कृषी वारशासाठी आणि पारंपरिक ज्ञानासाठी हा दिवस ऐतिहासिक ठरलाय. राज्याच्या ५ वैशिष्ट्यपूर्ण कृषी उत्पादनांना अधिकृतपणे भौगोलिक मानांकन (Geographical Indication - GI Tag) प्राप्त झाले आहे, यामुळे गोव्याची ही उत्पादने आता जागतिक नकाशावर स्वतःची स्वतंत्र ओळख निर्माण करतील.
१. ताळगावाचे वांगे (Taleigao Vayingim): आपल्या विशिष्ट चवीसाठी आणि आकारासाठी हे वांगे प्रसिद्ध आहे.
२. मांगिलाल (Goa Hilario Mango): गोव्याच्या आंब्यांच्या विविध प्रकारातील हा एक उत्कृष्ट वाण आहे.
३. कोरगुट तांदूळ (Goa Korgut Rice): खाऱ्या जमिनीत येणारा हा पारंपरिक तांदूळ आरोग्यासाठी उत्तम मानला जातो.
४. काजू (Goa Kaju Apple): गोव्याच्या फेणी आणि इतर उपपदार्थांसाठी महत्त्वाचा असलेला काजू आता अधिकृत ओळख पावेल.
५. मुसारद आंबा (Goa Mussarad Mango): गोव्याच्या बागायती शेतीचे वैभव असलेला हा आंबा आता जीआय टॅगने सन्मानित झाला आहे.
या महत्त्वाच्या टप्प्याबद्दल माहिती देताना सरकारने सांगितले की, हे जीआय टॅग 'स्वयंपूर्ण गोवा' मोहिमेला अधिक बळकट करतील. यामुळे स्थानिक शेतकऱ्यांचे सक्षमीकरण होईल, पारंपरिक वाणांचे जतन होईल आणि बाजारपेठेत या उत्पादनांना अधिक चांगली किंमत मिळेल. ग्रामीण गोव्यातील तरुणांसाठी कृषी-उद्योजकता आणि शाश्वत उपजीविकेच्या नवीन संधी यामुळे निर्माण होणार आहेत.
जीआय मानांकन मिळाल्यामुळे ग्राहकांना अस्सल गोमंतकीय उत्पादने मिळतील. यामुळे केवळ आर्थिक विकासच होणार नाही, तर गोव्याची कृषी संस्कृती जगासमोर अभिमानाने सादर केली जाईल. हे यश मिळवून दिल्याबद्दल सरकारने गोव्यातील शेतकरी, उत्पादक संस्था आणि या प्रक्रियेत सहभागी असलेल्या सर्व भागधारकांचे अभिनंदन केले आहे. शेतकऱ्यांच्या अनेक वर्षांच्या कष्टाचे आणि पारंपरिक शेती पद्धतीचे हे फळ असल्याचे मानले जात आहे.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.