पणजी: कचरा व्यवस्थापन मजुरांच्या वेतनामध्ये दरमहा २.९६ लाख रुपयांचा घोटाळा होत असल्याची तक्रार पंच सदस्य इनासियो डॉमनिक परेरा यांनी ३१ मे रोजी भ्रष्टाचार प्रतिबंधक विभागाकडे (एसीबी) केली होती. मात्र, या तक्रारीवर कोणतीही कारवाई न झाल्याने परेरा यांनी न्यायालयाचा दरवाजा ठोठावला. या पार्श्वभूमीवर सत्र न्यायालयाने एसीबीचे पोलिस निरीक्षक आणि अधीक्षकांना नोटीस बजावली असल्याची माहिती याचिकाकर्ते परेरा यांनी दिली.
या प्रकरणातील पुढील सुनावणी ६ ऑगस्ट रोजी होणार आहे. परेरा म्हणाले, मी ही तक्रार ३१ मे रोजी दिली असून त्यावर आजपर्यंत कोणतीही कारवाई झालेली नाही. त्यामुळे या भ्रष्टाचाराला आळा बसत नाही. अखेर मला न्यायालयात जावे लागले. न्यायालयाने संबंधित अधिकाऱ्यांना नोटीस पाठवली आहे.
एफआयआर नोंदवायला इतका वेळ का लागतो? एसीबी खरेच काम करते का? जर त्यांना कारवाईच करायची नसेल, तर मग सरकारने हा विभागच बंद करावा, अशी संतप्त प्रतिक्रिया त्यांनी दिली.
परेरा यांनी यापूर्वीही काही आर्थिक अनियमिततांविषयी आवाज उठविला असून, सध्या त्यांनी उघड केलेला घोटाळा हे गाव पातळीवरील मोठे आर्थिक अपव्ययाचे प्रकरण मानले जात आहे. या घोटाळ्याची चौकशी योग्य पद्धतीने व वेळेत व्हावी, अशी मागणी स्थानिक पातळीवरही जोर धरू लागली आहे.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
