Goa News: सर्व मच्छीमार जेटींवर सीसीटीव्ही बसविणार- निळकंठ हळर्णकर

Goa News: राज्यात बेकायदेशीरीत्या एलईडी मासेमारी होत असल्याचे उघड झाल्यानंतर मच्छीमार खात्यावर जोरदार टीका झाली होती. त्यामुळे मच्छीमार खाते बऱ्यापैकी सक्रिय झाले असून हे बेकायदेशीर कृत्य रोखण्यासाठी त्यांची धडपड सुरू झाली आहे. या दिशेने महत्त्वाचे पाऊल उचलताना सर्व मच्छीमार जेटींवर सीसीटीव्ही कॅमेरे बसविले जाणार असल्याची माहिती मच्छीमारमंत्री निळकंठ हळर्णकर यांनी दिली.

राज्यात शाश्‍वत मासेमारीला चालना देण्याची गरज असून एलईडी मासेमारी कोणत्याही स्थितीत बंद होईल याची दक्षता घेणार आहे. यासाठी सीसीटीव्ही कॅमेरे महत्त्वाचे असून वास्को येथील खारीवाडा जेटीवर काम सुरु झाले आहे.

राज्यातील इतर जेटींवरही लवकरच काम सुरू होणार आहे. एखाद्या जेटीवर एलईडी मासेमारी होत असल्याचे पुरावे मिळाल्यास त्या जेटीवरील मच्छीमार खात्याच्या अधिकाऱ्यावर कठोर कारवाई केली जाईल, असे हळर्णकर यांनी स्पष्ट केले.