CM Pramod Sawant: आर्टिफिशियल इंटेलिजन्स, रोबोटिक एज्युकेशन, इनोव्हेशनमध्ये गोवा पहिल्या क्रमांकावर आहे. रोबोटिक एज्युकेशन देणारे गोवा हे पहिले राज्य आहे. सर्व शाळांनी सहावीच्या वर्गात हा विषय आम्ही लागू केला आहे, अशी माहिती मुख्यमंत्री आणि शिक्षणमंत्री डॉ. प्रमोद सावंत यांनी दिली. शनिवारी अखिल भारतीय शिक्षा समागम कार्यक्रमात ते बोलत होते.
ते म्हणाले, रोबोटिक क्षेत्रात विद्यार्थी खूप चांगले काम करत आहेत. गोव्यातील सहा विद्यार्थ्यांची निवड सिंगापूरमधील रोबोटिक स्पर्धेसाठी झाली आहे. म्हणजे गोव्याची मुले आता देशाचे प्रतिनिधित्व करत आहेत.
मुख्यमंत्री म्हणाले, धोरणे ठरली तरी त्याची अंमलबजावणी शिक्षक आणि पालकांवर अवलंबून असते. शिक्षण क्षेत्रात गोव्याचे नाव आघाडीवर घेतले जाते. देशात राष्ट्रीय शिक्षण धोरणाबाबत उत्साही वातावरण आहे. प्रत्येक राज्य त्यावर काम करत आहे.
त्यात एकसूत्रीपणा असावा यासाठी प्रशिक्षण दिले जात आहे. ट्रेनिंग वर्षभर सुरू राहणार आहे. शिक्षकांनी हे ट्रेनिंग नीट घेतले तर राष्ट्रीय शिक्षण पॉलिसी तळागाळापर्यंत पोहचेल. भविष्यात काहीही गरज लागली तर सरकार त्यासाठी तत्पर आहे.
प्रत्येक शाळेत निपुण सेल कार्यरत आहे. निपुण सेल मार्फत आम्ही विविध उपक्रम राबवत आहोत. दिष्टावो नावाचा चॅनेल सुरू केले. देशात प्रथमच गोव्यात हे झाले आहे. त्या मार्फत पहिले ते तिसरीपर्यंतचे सर्व लेक्चर्स व्हिडिओ रेकॉर्डिंग केले गेले आहे. प्रसाद लोलयेकर यांचे यात मोठे योगदान आहे. या चॅनेलची देशभरात दखल घेतली गेली.
ते म्हणाले, तीन ते पाच वर्षांपर्यंत पुस्तक आणि पेनची गरज नाही. त्यासाठीच शिक्षकांना प्रशिक्षण दिले जाते. मास्टर ट्रेनर तयार केले आहेत. शारिरीक विकास, मानसिक विकास आणि आध्यात्मिक विकास साधायचा आहे. केवळ पोपट तयार करायचे नाहीत.
करीयरमध्ये हे विद्यार्थी यशस्वी ठरले पाहिजेत. त्यासाठी सर्वांगीण विकास महत्वाचा आहे. त्यासाठी नवीन राष्ट्रीय शिक्षण धोरण महत्वाची भूमिका पार पाडणार आहे.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
