Margao Fire News: मडगांव आके येथे फार्मसीला आग; सुदैवाने अनर्थ टळला

Fire Caught in Madgaon

मडगांव आके येथील सिने विशांतच्या बाजूला असलेल्या इमारतीमधील पारस फार्मसीला आज मंगळवारी पहाटे आग लागली. मात्र, ही आग लगेच आटोक्‍यात आणण्‍यात अग्निशमन दलाच्या कर्मचाऱ्यांना यश आल्याने मोठा अनर्थ टळला.

या आगीत सुमारे 50 हजारांचे नुकसान झाल्याचा प्राथमिक अंदाज वर्तवण्यात आलाय. इमारतीत इतर अनेक दुकाने आहेत. शिवाय कित्येक सदनिका असून कित्येक कुटुंबे राहतात.

पहाटे पारस फार्मसीतून धूर येत असल्‍याचे कोणीतरी पाहिले व लगेच त्यांनी फार्मसीचे मालक संदेश पै यांना फोन करून माहिती दिली. त्‍याचवेळी अग्निशमन दलाला कळविण्यात आले. जवानांनी आग आटोक्‍यात आणली.

काही दिवसांपूर्वी लोयोला हायस्कूलच्या मागे सज्जन नाईक यांच्या मालकीचे सेलिब्रेशन गिफ्ट कम स्टेशनरी शॉप नावाचे दुकान आहे. या दुकानात असलेले मौल्यवान गिफ्ट वस्तू, स्टेशनरी, कॉम्पुटर, झेरॉक्स मशीन, प्रिंटर सहित इतर वस्तू या आगीच्या भक्षस्थानी पडल्या होत्या.

ही आग कशामुळे लागली यामागचे कारण समजू शकले नाही मात्र आगीचे प्रमाण एवढे होते की आग विझविण्यात अग्निशमनला दोन गाड्या वापराव्या लागल्या होत्या.