Goa Fire Case: कुंकळ्ळीतील मिनरल वॉटर कारखान्याला आग; लाखो रुपयांचे नुकसान

Goa Fire Case: कुंकळ्ळी औद्योगिक वसाहतीतील डिमॅक इंडस्ट्रीजमध्ये शनिवारी रात्री आगीची घटना घडली. वीज पुरवठा खंडित केल्यावर कुंकळ्ळी अग्निशामक दलाकडून मशिनरीवर पाण्याचा मारा करीत ही आग विझवण्यात आली. या घटनेत कंपनीतील मशिनरीसह संगणक, टेबल, खुर्च्या अशा साहित्यासह लाखो रुपयांचे नुकसान झाले.

मिळालेल्या माहितीनुसार, कुंकळ्ळी औद्योगिक वसाहतीतील सिंडीज आयस्क्रीम फॅक्टरीनजीक असलेल्या डिमॅक इंडस्ट्रीजमधील मशिनरीला आग लागण्याची घटना शनिवारी रात्री सव्वा दहा वाजण्याच्या सुमारास घडली.

डिमॅक इंडस्ट्रीजमध्ये मिनरल वॉटर बॉटल्समध्ये भरण्यात येते. आगीच्या घटनेनंतर कुंकळ्ळी अग्निशामक दलाला पाचारण करण्यात आले.

अग्निशामक दलाच्या जवानांनी वीज पुरवठा खंडित केला आणि दीड तासांच्या प्रयत्नांनंतर रात्री साडेअकरा वाजता आगीवर नियंत्रण आणले.

या आगीमध्ये कंपनीतील पाणी बाटल्यामध्ये भरण्याचे मशिन, बाटल्या, सीलबंद करण्याची मशिन, पाणी बाटलीवर लेबल लावण्याचे मशिन यासह इतर मशिन्स व दोन संगणक, दोन टेबल, खुर्च्या असे साहित्य आगीच्या भक्ष्यस्थानी पडले.

यात कंपनीचे लाखाेंची हानी झालेली आहे. कुंकळ्ळी अग्निशामक दलाचे स्टेशन अग्निशामक अधिकारी तृप्तेश नाईक यांच्यासह नीलेश नाईक, रमण गावकर, हरी पावस्कर, सिद्धांत आरोलकर, सौरभ शेटकर यांनी आग विझवण्याच्या कामगिरीत सहभाग घेतला.