अग्निशमन दलाकडून गोव्यात रोज तिघांना जीवदान!

पणजी : राज्यात आग विझविण्याबरोबरच मानवी सुरक्षा आणि मालमत्तेच्या संरक्षणासाठी कार्यरत असलेल्या अग्निशमन आणि आपत्कालीन सेवा संचालनालयाने गेल्या वर्षभरात केलेले कार्य लक्षणीय आहे. या खात्याच्यावतीने दररोज 3 जीवांना वाचविण्यात यश आले असून कोट्यवधी रुपयांची मालमत्ता आगीच्या भक्ष्यस्थानी पडण्यापासून वाचविली आहे.

या क्षेत्रात सेवा बजावताना धारातीर्थी पडलेल्या जवानांचे स्मरण करण्याबरोबर नव्या तंत्रज्ञानाचा अवलंब करून अशा दुर्घटना कशा टाळता येतील किंवा कमी करता येतील यासाठी आज देशभर राष्ट्रीय अग्निशमन (Fire Brigade) दिवस पाळला जातो. या सेवा संचालनालयाच्यावतीने एप्रिल 2021 ते मार्च 2022 या वर्षभरात उल्लेखनीय कार्य केले आहे. या विभागाकडे आलेले 4 हजार 439 कॉल अटेंड करण्यात आले. यापैकी 1 हजार 923 दुर्घटना (Accident) स्थळाला प्रत्यक्ष भेट देऊन 271 व्यक्तींना आणि 632 जनावरांना जीवदान दिले. याबरोबरच 52 कोटी 80 लाख रुपयांची जंगम मालमत्ता वाचविण्यात या सेवा संचालनालयाला यश आले आहे, अशी माहिती संचालक नितीन रायकर यांनी दिली आहे.

अग्निशमन आणि आपत्कालीन सेवा संचालनालयाकडे 1106 कर्मचारी असून त्यापैकी 714 कर्मचारी कार्यरत आहेत. या विभागातील कामाचा भार लक्षात घेता 571 रिक्त जागा भराव्या लागतील. त्या भरण्यासाठी विभागाकडून पाठपुरावा करण्यात येत आहे. यापैकी 200 अग्निशमन जवानांची तातडीची गरज आहे. 3 विभागात कार्यरत असलेल्या या विभागाचा उत्तर विभाग पणजीत, दक्षिण विभाग मडगावात (Madgaon), तर फोंडा येथे मध्य विभाग कार्यरत आहे. अग्निशमन दलाकडे 77 वाहने असून 1 एरियल लॅडर प्लॅटफॉर्म असणारे आधुनिक वाहन, तर 2 टर्न टेबल लॅडर वाहन असून अजून 2 टर्न टेबल लॅडर वाहनांची आवश्यकता आहे.