Goa Electricity Rate: गोमंतकीयांना बसणार वीज दरवाढीचा शॉक! वीजमंत्री ढवळीकरांनी दिली माहिती; प्रतियुनिट किती होणार वाढ? वाचा

पणजी: गोव्यातील वीजदरात लवकरच प्रतियुनिट ५ पैसे ते २५ पैशांपर्यंत वाढ होऊ शकते, अशी माहिती वीजमंत्री सुदिन ढवळीकर यांनी दिली. ही वाढ घरगुती वापरासाठी ५ पैसे तर व्‍यावसायिक ग्राहकांसाठी २५ पैसे इतकी असेल.

राज्‍यात सुरू असलेल्या प्रगत दर्जाच्या वीजविकास प्रकल्पांमुळे ही दरवाढ अपरिहार्य असल्याचे त्यांनी सांगितले. दरम्‍यान, ९ मे रोजी सकाळी १० वाजता येथील इन्स्टिट्यूट मिनेझिस ब्रागांझा संस्‍थेच्‍या सभागृहात यासंदर्भात जॉईंट इलेक्ट्रिसिटी रेगुलेटरी कमिशनची (जेईआरसी) सार्वजनिक सुनावणी होणार आहे.

जेईआरसीच्या नियमानुसार दरवर्षी वीज विभागाला आर्थिक ऑडिट करावे लागते. त्यात उघडकीस आलेल्या तोट्याची भरपाई करणे आवश्यक असते. गोव्यात सध्या सुरू असलेली कामे ही इतकी दर्जेदार आहेत की त्यामुळे आम्ही ‘बी’ वर्गातून ‘ए’ वर्गात पोहोचलो आहोत, आणि आता ‘ए+’ वर्गात समाविष्ट होण्यासाठी तयारी सुरू आहे, असे ढवळीकर म्‍हणाले.

जर ५ पैसे वीजदरवाढ झाली तर ती फार मोठी नसेल. आपण जेवढा दर्जेदार विकास करत आहोत, त्याची किंमत लोकांनी थोडीशी चुकती केली पाहिजे असे सांगत मंत्र्यांनी दरवाढीला नैसर्गिक परिणाम मानले. त्यांनी यासोबतच स्पष्ट केले की, गोवा स्वतः वीज उत्पादन करत नाही, तर इतर राज्यांकडून वीज खरेदी करते. त्यामुळे दरवाढ ही इतर राज्यांच्या तुलनेत खूपच कमी आहे.