Goa Drunk and Drive: नशा, भरधाव वेग आणि अपघात; तळीरामांना थोपवण्याचे पोलिसांपुढे आव्हान, बाणस्तारी नंतर आसगावात दुसरी घटना

Goa Drunk and Drive Accident: बाणस्तारी येथे घडलेले ‘ड्रंक ॲण्ड ड्राइव्ह’चे प्रकरण ताजे असतानाच काल मध्यरात्री आसगाव येथे एका मद्यधुंद पर्यटक कारचालकाने आपल्या ‘हुंडाई आय-२०’ या ‘रेंट अ कार’ने दुसऱ्या एका कारला जोरदार धडक दिली.

या अपघातात हुंडाई गाडीतील सुरज शर्मा (डेहराडून) व अंकिता पाल (दिल्ली) हे दोघे गंभीर जखमी झाले. या अपघातात दोन्ही कारचे मोठे नुकसान झाले.

म्हापशाहून आसगावमार्गे शिवोलीकडे येणाऱ्या ‘रेंट अ कार’ने (क्र. जीए - ०३ - डब्ल्यू - ७०३३) आसगाव येथे पोचताच तेथे रस्त्याकडेला उभ्या करून ठेवलेल्या अर्चना नाईक यांच्या वॅगनर कारला (क्र. जीए - ०३ - आर - ११७४) जोरदार धडक दिली.

कारमध्ये बिअरच्या बाटल्या!

पर्यटकांच्या अपघातग्रस्त कारमध्ये दर्शनी आसनावर बिअरच्या बाटल्या पडल्या होत्या. हे पर्यटक दारू प्राशन करीत वाहन चालवत होते आणि याच मद्यधुंद स्थितीत त्यांचे कारवरील नियंत्रण गेले आणि हा अपघात घडल्याचा दावा रहिवाशांनी केला आहे. हणजूण पोलिसांनी कारचालक पर्यटकाच्या विरोधात गुन्हा नोंद केला आहे. पुढील तपास सुरू आहे.

मद्यधुंद पर्यटक गंभीर जखमी

या अपघातात सुरज शर्मा व अंकिता पाल हे पर्यटक गंभीर जखमी झाले आहेत. हणजुण पोलिसांनी घटनास्थळी धाव घेत मद्यधुंद अवस्थेत असलेल्या जखमी पर्यटकांना प्रथम म्हापसा व नंतर बांबोळी येथील गोमेकॉ इस्पितळात उपचारासाठी दाखल केले.