Goa Dairy Corruption News: गोवा डेअरी भ्रष्टाचार प्रकरण; 14 अपात्र संचालकांच्या प्राथमिक सदस्यत्वावरही गंडांतर

Goa Dairy Corruption News: गोवा डेअरीतील भ्रष्टाचार प्रकरणी 14 संचालकांना सहकार निबंधकांनी एप्रिल 2023 मध्ये अपात्र ठरवले होते. आता या 14 ही संचालकांना ते ज्या मूळ सहकारी संस्थेचे प्राथमिक सदस्य आहेत, त्यावरूनही हटविण्याचे आदेश संबंधित सोसायट्यांना देण्यात आले आहेत.

ज्या संस्था असे करणार नाहीत, त्या संस्थांवर कडक कारवाई करण्याचा इशाराही देण्यात आला आहे. स्थानिक माध्यमांनी याबाबतचे वृत्त दिले आहे. सहकार खात्याचे उपनिबंधक सीताराम गुरूदास सावळ यांनी ही कारवाई केली आहे.

सहकारी संस्थांतील प्राथमिक सदस्यपदावरच गंडांतर आल्यावर या संचालकांची सहकार कारकिर्द संपुष्टात येणार आहे. दरम्यान, अपात्र संचालकांच्या अपिलावर मुंबई उच्च न्यायालयात याच आठवड्यात सुनावणी होणार आहे.

प्राथमिक सदस्यत्व गोठविण्यात आलेल्या संचालकांमध्ये राजेश कृष्णा फळदेसाई, विठोबा दत्ता देसाई, गुरूदास केशव परब, आत्माराम माधव सहकारी, धनंजय नंदा देसाई, माधवराव शिवाजीराव देसाई, बाबुराव श्रीकांत देसाई, विजयकांत विठोबा गावकर, रूद्रेश्वर शिवानंद पेडणेकर, राजेंद्र वाय. सावळ, उल्हास सिनारी, अजय लक्ष्मीकांत देसाई, बाबू नरहरी कोमरपंत, आलेक्सो फुर्तादो यांचा समावेश आहे.