गोव्यातील नावेली येथील एका रहिवाशाला सायबर गुन्हेगारांनी बनावट मोबाईल ॲपच्या माध्यमातून तब्बल 1.96 लाखांचा गंडा घातल्याची घटना समोर आली आहे. KUKU TV या लोकप्रिय ॲपच्या नावाने पाठवण्यात आलेली संशयास्पद APK फाईल डाउनलोड केल्यानंतर संबंधित व्यक्तीचा मोबाईल तात्पुरता निकामी झाला. त्यानंतर अज्ञात व्यक्तीने मोबाईल बँकिंगचा अनधिकृत वापर करून बँक खात्यातील रक्कम परस्पर हस्तांतरित केल्याचा आरोप आहे.
प्राथमिक माहितीनुसार, पीडित व्यक्तीने KUKU TV ॲप असल्याचा विश्वास ठेवून APK फाईल आपल्या मोबाईलमध्ये इन्स्टॉल केली. इन्स्टॉलेशन पूर्ण झाल्यानंतर काही क्षणांतच मोबाईल व्यवस्थित प्रतिसाद देणे बंद झाल्याचे सांगितले जात आहे. याच संधीचा फायदा घेत सायबर गुन्हेगारांनी मोबाईलवरील बँकिंग सेवांमध्ये प्रवेश मिळवला.
सायबर हल्लेखोरांनी पीडिताच्या मोबाईल बँकिंग ॲपमध्ये अनधिकृत प्रवेश करून खात्यातून 1.96 लाखांची रक्कम दुसऱ्या खात्यात हस्तांतरित केल्याचा आरोप आहे. फसवणूक लक्षात आल्यानंतर संबंधित व्यक्तीने तातडीने पोलिसांकडे धाव घेत तक्रार दाखल केली.
या प्रकरणी मडगाव पोलीस सायबर फसवणुकीचा गुन्हा नोंदवून तपास करत आहेत. संशयित व्यक्तीचा शोध घेण्यासाठी डिजिटल पुरावे, व्यवहारांची माहिती आणि इतर तांत्रिक बाबींची पडताळणी सुरू आहे.
सायबर तज्ज्ञांच्या मते, अधिकृत Google Play Store किंवा Apple App Store वगळता इतर कोणत्याही स्रोतावरून APK फाईल डाउनलोड करणे धोकादायक ठरू शकते. अनोळखी लिंक, मेसेज किंवा सोशल मीडियावरून मिळालेल्या ॲप्सवर विश्वास ठेवू नये. मोबाईलमध्ये संशयास्पद हालचाल जाणवल्यास त्वरित इंटरनेट बंद करून बँकेशी आणि सायबर पोलिसांशी संपर्क साधण्याचा सल्ला दिला जात आहे.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.