Goa News: कुडचडेत जलवाहिनी फुटून पाण्याची नासाडी

Goa News: भूमिगत केबल घालताना अनेक ठिकाणी जलवाहिन्या फुटून मोठ्या प्रमाणावर पाण्याची नासाडी होऊ लागली आहे. अशीच एक घटना होडर-शेळडे येथे घडली व हजारो लिटर पाणी वाया गेले. पाणी विभागाच्‍या सुस्‍त कारभारामुळे नागरिकांनी मात्र तीव्र संताप व्यक्त केला.

होडर-शेळडे येथे भुयारी वीजवाहिन्या घालण्यासाठी कंत्राटदाराने अनेक ठिकाणी खोदकाम सुरू केले आहे. त्‍यामुळे जलवाहिन्‍यांना धोका निर्माण झाला होता. आज ही भीती खरी ठरली. मुख्य रस्त्यावर पाण्याची जलवाहिनी फुटून पाण्याची नासाडी झाली.

याबाबत शिवयोद्धा संघटनेचे उपाध्यक्ष राजू मोरजकर यांनी सांगितले की, कंत्राटदार आपले काम वेळेत पूर्ण करण्‍यासाठी घाईगडबडीत अनेक ठिकाणी जलवाहिनीला धोका निर्माण करतात. तीच गोष्ट होडर येथे घडली.

भुयारी वीजवाहिन्या (Power Lines) घालताना जलवाहिनीला धोका निर्माण शेवटी ती फुटलीच. कुडचडेचे आमदार तथा सार्वजनिक बांधकाममंत्री नीलेश काब्राल यांनी याप्रश्‍‍नी लक्ष घालावे, अशी मागणी होत आहे.