Goa Culture: ''दे धेंडलो, धेंडल्यान पावस शेणलो'' सावईवेरेत धेंडलोत्सव उत्साहात

Goa Culture: ''दे धेंडलो, धेंडल्यान पावस शेणलो '' अशी पारंपरिक लोकगीते गाऊन ढोल - ताशांच्या निनादात सावईवेरे गावातील वाड्या - वाड्यांवर काल धेंडलो उत्सव उत्साहात साजरा करण्यात आला. विविधरंगी कागदांनी व सुवासिक फुलांनी लाकडी घुमटी सुशोभित करून घुमटीत श्रीकृष्णाची छोटी मूर्ती अधिष्ठित करण्यात आली.

पूर्वापार पद्धतीने पूजा - अर्चा करून धेंडलो डोक्यावर घेऊन वाद्यांच्या तालात धेंडलो नाचवत व पारंपरिक लोकगीते म्हणत गावातील वाड्या - वाड्यावरील घरोघरी धेंडल्याची मिरवणूक काढण्यात आली. या मिरवणुकीत ज्येष्ठ मंडळीसह बराच युवक तसेच बाल वर्गाचाही समावेश होता.

प्रत्येकाच्या घरी सुहासिनीकडून धेंडल्याचे आनंदाने स्वागत करून त्यास गंध फुले वाहून दक्षिणा देताना दिसत होत्या. धेंडल्याच्या पारंपारिक गायीला जाणाऱ्या गीतांनी आणि वाद्यांच्या निनादामुळे सावईवेरे गावातील वातावरण मंगलमय झाले होते.

पाडव्यानिमित्त या भागातील शेतकऱ्यांनी आपल्या गुरांचीही पूजाही केली. आजच्या दिवशी तुळशीवृंदावनाजवळ शेणाचा गोठा बनवून गोठ्याची विधिवत पूजाही करण्यात आली.