Goa Drugs Seized: हरमल येथे ड्रग्ज तस्करीप्रकरणी रशियन महिलेला अटक; 4 लाखाचे अमली पदार्थ जप्त

Goa Drugs Seized: गोवा पोलिसांच्या अंमलीपदार्थविरोधी पथकाने गुरूवारी उत्तर गोव्यातील हरमल (Arambol) येथील खालचावाडा या भागात छापा टाकला. यात ड्रग्ज बाळगल्याप्रकरणी एका रशियन महिलेला अटक करण्यात आली आहे.

या संशयित महिलेचे नाव मार्गारिटा पिगिना (38 वर्षे) असे आहे. पोलिसांनी तियाकडून 4 लाख रुपये किंमतीचे 800 ग्रॅम चरस जप्त केले आहे.

पोलिसांना या भागात ड्रग्ज तस्करीची गुप्त माहिती मिळाली होती. त्या पार्श्वभूमीवर अमली पदार्थ विरोधी पथकाने येथे छाप्याची तयारी केली होती. संबंधित रशियन महिला येथे आली असता तिला रंगेहाथ पकडण्यात पथकाला यश आले. तिच्याकडे सध्या चौकशी केली जात आहे.

दरम्यान, गोव्यातील हरमल, हणजुणे भागात पर्यटन हंगामाच्या काळात ड्रग्ज तस्करीचे प्रकार उघडकीस येत असतात. गोव्यात सध्या पर्यटन हंगामास सुरवात झाली आहे. रशियन पर्यटकांना घेऊन पहिले चार्टर विमान गोव्यात एक ऑक्टोबर रोजी दाखल झाले आहे.